മട്ടന്നൂര്‍: ഇരുപതുവര്‍ഷത്തെ ചരിത്രം സാക്ഷി. നഗരസഭയില്‍ നടന്ന അഞ്ചാമത്തെ തെരഞ്ഞെടുപ്പില്‍ മട്ടന്നൂരിന് വീണ്ടും ചുവപ്പേറി. തെരഞ്ഞെടുപ്പ് നടന്ന 35ല്‍ 28 വാര്‍ഡും ഇടതുമുന്നണിക്കൊപ്പം നിന്നു. യു.ഡി.എഫിന് ഏഴ് വാര്‍ഡുകളില്‍ മാത്രമേ വിജയിക്കാനായുളളൂ. നാലിടങ്ങളില്‍ വിജയപ്രതീക്ഷ പുലര്‍ത്തിയ ബി.ജെ.പിക്ക് ഒരു സീറ്റുപോലും കിട്ടിയില്ല. എന്നാല്‍ ഒന്‍പതു വാര്‍ഡുകളില്‍ ബി.ജെ.പി രണ്ടാം സ്ഥാനത്തെത്തി. രണ്ടിടങ്ങളില്‍ എല്‍.ഡി.എഫ് മൂന്നാം സ്ഥാനത്തേക്ക് പിന്‍തള്ളപ്പെട്ടു. യു.ഡി.എഫ് കഴിഞ്ഞ തവണ ജയിച്ച ഏഴു സീറ്റുകളാണ് ഇടതുമുന്നണി പിടിച്ചെടുത്തത്. കോണ്‍ഗ്രസിന് നാലും മുസ്‌ലീം ലീഗിന് മൂന്നും സീറ്റുകള്‍ കൊണ്ട് ഇക്കുറി തൃപ്തിപ്പെടേണ്ടി വന്നു.