തൃക്കരിപ്പൂര്‍: അത്യാധുനിക സംവിധാനത്തോടെയുള്ള പൈക്ക ഇന്‍ഡോര്‍ സ്റ്റേഡിയം 13നു വ്യവസായ കായിക മന്ത്രി ഇ.പി ജയരാജന്‍ ഉദ്ഘാടനം ചെയ്യുമെന്ന് പൈക്ക ഇന്‍ഡോര്‍ സ്റ്റേഡിയം മാനേജ്‌മെന്റ് വാര്‍ത്താസമ്മളനത്തില്‍ അറിയിച്ചു.
സൗത്ത് തൃക്കരിപ്പൂര്‍ ഇളമ്പച്ചിയില്‍ നിര്‍മാണ പ്രവൃത്തി പൂര്‍ത്തിയായ സ്റ്റേഡിയത്തില്‍ ഷട്ടില്‍ ബാഡ്മിന്റണ്‍ കോര്‍ട്ടുകള്‍, ആധുനിക നീന്തല്‍ കുളം, ജിംനേഷ്യം, സ്റ്റീം ബാത്ത്, സോനാബാത്ത്, വോളിബോള്‍, ബാസ്‌ക്കറ്റ് ബോള്‍ കോര്‍ട്ടുകള്‍ തുടങ്ങിയവ ഒരുക്കിയിട്ടുണ്ട്.
    കളിക്കളത്തില്‍ ഇപ്പോഴും സജീവ സാന്നിധ്യമായ ഇളമ്പച്ചിയിലെ അബ്ദുല്‍ സലാം അഹമ്മദ് അബ്ദുല്ല എന്ന പ്രവാസി വ്യവസായി നേതൃത്വം നല്‍കുന്ന ഫായിക്ക ഗ്രൂപ്പ് ഓഫ് കമ്പനിസാണ് അക്കാദമിയുടെ പ്രമോട്ടര്‍. കളിക്കളത്തിനപ്പുറത്ത് എല്ലാവര്‍ക്കും പ്രയോജനപ്പെടുന്ന നിലയില്‍ ശീതീകരിച്ച കണ്‍വന്‍ഷന്‍ സെന്ററും പ്രവര്‍ത്തിക്കും.
നിര്‍ധനരായ രണ്ടു പെണ്‍കുട്ടികളുടെ കല്ല്യാണത്തിനാവശ്യമായ സഹായങ്ങള്‍ ഉദ്ഘാടനത്തോടനുബന്ധിച്ചു നല്‍കാനും തീരുമാനിച്ചിട്ടുണ്ട്. കൂടാതെ പ്രമുഖ കലാകാരന്മാരെ പങ്കെടുപ്പിച്ചു ഗാനമേളയും സംഘടിപ്പിക്കും.  
വാര്‍ത്താസമ്മേളനത്തില്‍ അബ്ദുല്‍ സലാം അഹമ്മദ് അബ്ദുല്ല, ടി.എം അമീര്‍ ഹാജി, എം അബ്ദുല്ല, എം നൗഷാദ്, മുഹമ്മദ് ഫര്‍ഹാന്‍ സംബന്ധിച്ചു.