ന്യൂഡല്‍ഹി: 200 രൂപയുടെ പുതിയ നോട്ടുകള്‍ റിസര്‍വ് ബാങ്ക് പുറത്തിറക്കി. മഹാത്മാഗാന്ധി സീരിസില്‍പെട്ട നോട്ടുകള്‍ റിസര്‍വ് ബാങ്ക് ഗവര്‍ണര്‍ ഉര്‍ജിത് പട്ടേലിന്റെ ഒപ്പോടു കൂടിയാണ് പുറത്തിറക്കിയത്. വെള്ളിയാഴ്ച്ച 200 രൂപയുടെ നോട്ടുകള്‍ പുറത്തിറക്കുമെന്ന് കഴിഞ്ഞ ദിവസം ആര്‍.ബി.ഐ പത്രക്കുറിപ്പിലൂടെ അറിയിച്ചിരുന്നു.

ആര്‍.ബി.ഐയുടെ തിരഞ്ഞെടുക്കപ്പെട്ട ഓഫിസുകളില്‍ നിന്നും ചില ബാങ്കുകള്‍ വഴിയുമാണ് നോട്ടുകള്‍ പുറത്തിറക്കിയത്.

എന്നാല്‍ പുതിയ 200 രൂപ നോട്ടുകള്‍ ഉടന്‍തന്നെ എ.ടി.എമ്മുകളിലെത്തില്ലെന്നാണ് ലഭിക്കുന്ന വിവരം. പുതിയ നോട്ടുകള്‍ ലഭിക്കത്തക്ക രീതിയില്‍ എ.ടി.എം മെഷീനില്‍ മാറ്റം വരുത്തേണ്ടി വരും എന്നതിനാലാണ് ഇത്.

കടും മഞ്ഞ നിറത്തിലുള്ള നോട്ടിന്റെ പുറകില്‍ സാഞ്ചി സ്തൂപത്തിന്റെ ചിത്രമാണ് ഉള്ളത്.