കോട്ടയം: അന്തരിച്ച എന്‍.സി.പി മുന്‍ സംസ്ഥാന പ്രസിഡന്റ് ഉഴവൂര്‍ വിജയന് മന്ത്രി തോമസ് ചാണ്ടി നല്‍കിയ ധനസഹായം അദ്ദേഹത്തിന്റെ കുടുംബം മടക്കി അയച്ചു. വിജയന്റെ മരണത്തില്‍ ദുരൂഹതയാരോപിച്ച് ബന്ധുക്കളും എന്‍.സി.പിയിലെ ഒരു വിഭാഗം നേതാക്കളും രംഗത്തുവന്നിരുന്നു.
ഇതിന് പിന്നാലെയാണ് തങ്ങള്‍ക്ക് അയച്ച തുക വിജയന്റെ ഭാര്യ ചന്ദ്രമണി മന്ത്രിയുടെ പേരില്‍ ഡി.ഡിയായി മടക്കിയച്ചത്. അസുഖബാധിതനായി കൊച്ചിയിലെ സ്വകാര്യാശുപത്രിയില്‍ ചികിത്സയിലിരിക്കെ മന്ത്രി തോമസ് ചാണ്ടി വിജയനെ കാണാനെത്തിയിരുന്നു. മരണത്തിന് മൂന്നുദിവസം മുന്‍പായിരുന്നു ഇത്. മടങ്ങുന്നതിന് മുന്‍പായി മന്ത്രി വിജയന്റെ കൈയില്‍ ഒരുകവര്‍ വച്ചുകൊടുത്തിരുന്നു. പിന്നീട് വിജയന്‍ ആവശ്യപ്പെട്ട പ്രകാരം ഭാര്യ കവര്‍ തുറന്നുനോക്കിയപ്പോഴാണ് 50,000 രൂപയാണെന്ന് മനസിലായത്. തുടര്‍ന്ന് ഈ തുക തോമസ് ചാണ്ടിക്ക് തിരിച്ചുനല്‍കണമെന്ന് അദ്ദേഹം ഭാര്യയോട് നിര്‍ദേശിച്ചിരുന്നു.
ആശുപത്രിയില്‍ ഗുരുതര നിലയില്‍ കഴിയവെ ഉഴവൂരിന്റെ കൈയില്‍ തോമസ് ചാണ്ടി പണം നല്‍കിയിട്ടു പോയത് അദ്ദേഹത്തെ മാനസികമായി തളര്‍ത്തിയെന്ന് എന്‍.സി.പി നേതാക്കളായ റാണി സാംജിയും സതീഷ് കല്ലക്കുളവും സാംജി പഴേപ്പറമ്പിലും വാര്‍ത്താസമ്മേളനത്തില്‍ ആരോപിച്ചു. രോഗം മൂര്‍ച്ഛിച്ച് ഐ.സി.യുവില്‍ കഴിയുന്നയാളുടെ കൈയില്‍ പണംവച്ചുകൊടുക്കുന്ന ലോകത്തിലെ ആദ്യവ്യക്തി തോമസ് ചാണ്ടിയായിരിക്കും. അതിനുശേഷമാണ് ഉഴവൂരിന്റെ ആരോഗ്യനില കൂടുതല്‍ വഷളായത്. നേരത്തെ രോഗബാധിതനായി കോട്ടയത്തെ സ്വകാര്യ ആശുപത്രിയില്‍ കിടന്നപ്പോഴും വീട്ടില്‍ വിശ്രമത്തിലായിരുന്നപ്പോഴും ഒരിക്കല്‍പ്പോലും ഉഴവൂര്‍ വിജയനെ സന്ദര്‍ശിക്കാതിരുന്നയാളാണ് തോമസ് ചാണ്ടി . അതേസമയം, മന്ത്രി തോമസ് ചാണ്ടിക്കെതിരേ ഉഴവൂര്‍ വിജയന്റെ ഭാര്യ ചന്ദ്രമണിയും നേരത്തെ ക്രൈംബ്രാഞ്ചിന് മൊഴി നല്‍കിയിട്ടുണ്ട്. തോമസ് ചാണ്ടി ആശുപത്രിയില്‍ വന്നുപോയശേഷം ഉഴവൂര്‍ വിജയന്‍ കൂടുതല്‍ അസ്വസ്ഥത പ്രകടിപ്പിച്ചെന്നാണ് മൊഴി.