കാട്ടിക്കുളം: കരടിയുടെ ആക്രമണത്തില്‍ കണ്ണ് നഷടപ്പെട്ട ആദിവാസി യുവാവിനെ അധികൃതര്‍ അവഗണിക്കുന്നു.
കാട്ടിക്കുളം രണ്ടാംഗേറ്റ് കോളനിയിലെ കരിയനാണ് വനം, ട്രൈബല്‍ വകുപ്പുകളുടെ അവഗണന നേരിടുന്നത്. കഴിഞ്ഞ ജൂണില്‍ നാഗര്‍ ഹോള വനത്തില്‍ തേന്‍ ശേഖരിക്കാന്‍ കോളനിക്കാരോടൊപ്പം പോയപ്പോഴാണ് കരടിയുടെ ആക്രമണം ഉണ്ടായത്. കൂടെയുണ്ടായിരുന്നവര്‍ മരത്തില്‍ കയറി രക്ഷപ്പെട്ടു.
എന്നാല്‍ രക്ഷപ്പെടുന്നതിന് മുന്‍പ് കരടിയുടെ ആക്രമണത്തിനിരയായ കരിയന്റെ ഒരു കണ്ണ് നഷ്ടമായി. ഗുരുതരമായി പരുക്കേറ്റ കരിയനെ തുടര്‍ന്ന് കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിക്കുകയായിരുന്നു.
മാസങ്ങള്‍ കഴിഞ്ഞിട്ടും കര്‍ണാടക വനംവകുപ്പിന്റെ ഒരു സഹായവും ലഭിച്ചിട്ടില്ലെന്ന് കരിയന്‍ പറഞ്ഞു. കാട്ടിക്കുളം രണ്ടാം ഗേറ്റ് കോളനിയില്‍ അമ്മാവന്റെ വീട്ടിലാണ് കരിയനും കുടുംബവും താമസിക്കുന്നത്.
സഹായങ്ങള്‍ ലഭിക്കാത്തതിനെ തുടര്‍ന്ന് കര്‍ണാക മുഖ്യമന്ത്രിക്കും ഫോറസ്റ്റ് ചീഫ് കണ്‍സര്‍വേറ്റര്‍ക്കും പരാതി നല്‍കിയിട്ടുണ്ട്.