കല്‍പ്പറ്റ: ജില്ലയിലെ റേഷന്‍ വ്യാപാരികള്‍ വിവിധ ആവശ്യങ്ങളുന്നയിച്ച് സെപ്റ്റംബര്‍ നാലിന് കലക്ടറേറ്റ് പടിക്കല്‍ പട്ടിണി സമരം നടത്തുമെന്ന് ഓള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ ജില്ലാ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
കഴിഞ്ഞ ഫെബ്രുവരി മുതലുള്ള ഏഴുമാസം നല്‍കാനുള്ള കമ്മിഷന്‍ തുക ഇതുവരെ വിതരണം ചെയ്തിട്ടില്ല. 2.54 കോടി രൂപയാണ് ഈയിനത്തില്‍ വ്യാപാരികള്‍ക്ക് ലഭിക്കാനുള്ളത്. ജില്ലയില്‍ 320ഓളം റീട്ടെയില്‍ റേഷന്‍ വ്യാപാരികളാണുള്ളത്. 2016 നവംബറില്‍ കേരളത്തില്‍ കേന്ദ്ര ഭക്ഷ്യസുരക്ഷാനിയമം പ്രാബല്യത്തില്‍ വന്നെങ്കിലും ഇത് നടപ്പാക്കുന്നതില്‍ പ്രധാന പങ്കുവഹിക്കുന്ന റേഷന്‍ വ്യാപാരികള്‍ക്ക് പ്രഖ്യാപിച്ച മിനിമം വേതനം നല്‍കാന്‍ പോലും സംസ്ഥാന സര്‍ക്കാര്‍ ഇതുവരേ തയാറായിട്ടില്ല. മിനിമം വേതനമായി 16000 രൂപ നല്‍കുമെന്ന് പ്രഖ്യാപിച്ചിട്ടും ഇതുവരെ നല്‍കിയിട്ടില്ല. ഈ സാഹചര്യത്തിലാണ് തിരുവോണനാളില്‍ റേഷന്‍ വ്യാപാരികള്‍ പട്ടിണിസമരം നടത്തുന്നത്.