കുമ്പള: ആരോരും തുണയില്ലാതെ ഒറ്റയ്ക്കു കഴിയുന്ന കുമ്പള കൊടിയമ്മ പുണ്ടിക്കട്ടയിലെ സീത്തമ്മയുടെ വീട്ടിലേക്കു പഞ്ചായത്തു പ്രസിഡന്റും കൊടിയമ്മ ഗവ.സ്‌കൂള്‍ വിദ്യാര്‍ഥികളും അധ്യാപകരുമെത്തി. സീത്തമ്മക്ക് ഓണസദ്യയുമായാണു വിദ്യാര്‍ഥികള്‍ ഇവരുടെ വീട്ടിലെത്തിയത്. സീത്തമ്മയുടെ ദുരിതവും കഴിഞ്ഞ ഒരു വര്‍ഷമായി ഇവരെ പരിചരിക്കുന്ന ആയിശുമ്മയുടെ സന്മനസും വരച്ചു കാട്ടി 'സുപ്രഭാതം' കഴിഞ്ഞ ദിവസം വാര്‍ത്ത നല്‍കിയിരുന്നു. ഇതു ശ്രദ്ധയില്‍പ്പെട്ടതിനെ തുടര്‍ന്നാണു കുമ്പള ഗ്രാമ പഞ്ചായത്ത് പ്രസിഡന്റ് കെ.എല്‍ പുണ്ഡരീകാക്ഷ, പി.ടി.എ പ്രസിഡന്റ് അബാസ് അലി, എസ്.എം.സി ചെയര്‍മാന്‍ അബ്ദുല്‍ ഖാദര്‍, അധ്യാപകരായ രാജു,ബ്രിജേഷ്, ജലീല്‍,പള്ളത്തിമാര്‍ എന്നിവരും സ്‌കൂള്‍ വിദ്യാര്‍ഥികളും സീത്തമ്മയെ സന്ദര്‍ശിച്ചത്. സ്‌കൂളില്‍ ഓണാഘോഷ ചടങ്ങു നടക്കുന്നതിനിടയിലാണ് വിദ്യാര്‍ഥികള്‍  ഇവരുടെ വീട്ടിലെത്തിയത്.