പാവറട്ടി: തെരുവു നായ്ക്കളുടെ കൂട്ടമായ ആക്രമണത്തില്‍ തമിഴ്‌നാട് സ്വദേശിക്ക് പരുക്കേറ്റു.
തിരുനെല്ലൂര്‍ കരയോഗം ഓഫിസിന് മുന്നില്‍ വച്ച് പുലര്‍ച്ച അഞ്ചോടെയാണ് അഞ്ചോളം നായ്ക്കള്‍ തമിഴ്‌നാട് വയല്‍പ്പെട്ടി രാജനെ കൂട്ടമായി ആക്രമിച്ച് പരുക്കേല്‍പ്പിച്ചത്.
രണ്ട് കൈകളിലും തുടയിലുമാണ് കടിയേറ്റത്. നിലവിളി കേട്ട് ഓടിക്കൂടിയ നാട്ടുകാര്‍ നായക്കൂട്ടത്തില്‍ നിന്ന് രക്ഷപ്പെടുത്തി തൃശ്ശൂര്‍ മെഡിക്കല്‍ ഹോസ്പിറ്റലില്‍ എത്തിച്ച് ചികിത്സ നടത്തി.
ഏറെ നാളായി തെരുവുനായകളുടെ ആക്രമണത്തെക്കുറിച്ച് ജനങ്ങള്‍ പരാതിപ്പെടുന്നു. തിരുനെല്ലൂര്‍ മുതല്‍ ചക്കംകണ്ടം വരെയുള്ള തീരദേശ മേഖല തെരുവു നായകളുടെ വിഹാര കേന്ദ്രമായിരിക്കുകയാണെന്നും പഞ്ചായത്ത് അധികൃതരും ജനങ്ങളും ചേര്‍ന്ന സമിതികളുണ്ടാക്കി തെരുവു നായകളെ അമര്‍ച്ച ചെയ്യണമെന്നും പരിസരവാസികള്‍ ആവശ്യപ്പെട്ടു.