മഞ്ചേശ്വരം: ട്രെയിനില്‍ കടത്തുകയായിരുന്ന 13 ലക്ഷത്തിന്റെ കഞ്ചാവ് റെയില്‍വേ സംരക്ഷണ സേന പിടികൂടി. കഴിഞ്ഞ ദിവസം രാത്രി ചെന്നൈയില്‍ നിന്നു മംഗളൂരുവിലേക്കു പോവുകയായിരുന്ന എഗ്‌മോര്‍ എക്‌സ്പ്രസിലെ ജനറല്‍ കംപാര്‍ട്ടുമെന്റില്‍ റെയില്‍വേ സംരക്ഷണസേനയിലെ എ.എസ്.ഐ വി.കെ ബിനോയിയുടെ നേതൃത്വത്തിലുള്ള സംഘം പരിശോധന നടത്തുന്നതിനിടെയാണ് വലിയ ബാഗുകളിലെ ആറു ബോക്‌സുകളിലായി 13.7 കിലോ തൂക്കം വരുന്ന കഞ്ചാവു കണ്ടെത്തിയത്. ട്രെയിന്‍ മഞ്ചേശ്വരത്തെത്തിയപ്പോഴാണു സംരക്ഷണ സേനയുടെ മിന്നല്‍ പരിശോധനയുണ്ടായത്. പിടിച്ചെടുത്ത കഞ്ചാവ് കാസര്‍കോട് എക്‌സൈസിനു കൈമാറി.