ഗൂഡല്ലൂര്‍: സാലിസ്ബറി കോ ഓപ്പറേറ്റീവ് തേയില ഫാക്ടറി മാനേജ്‌മെന്റിന്റെ തേയില കര്‍ഷകരോടും തൊഴിലാളികളോടുമുള്ള വൈരാഗ്യബുദ്ധിയോടെയുള്ള പ്രവര്‍ത്തനങ്ങളില്‍ പ്രതിഷേധിച്ച് ഡി.എം.കെ ഗൂഡല്ലൂര്‍ മുനിസിപ്പല്‍ കമ്മിറ്റിയുടെ ആഭിമുഖ്യത്തില്‍ ഇന്ന് പ്രതിഷേധ സമരം നടത്തും. രണ്ടാംമൈലിലെ സാലീസ്‌ബെറി കോ ഓപ്പറേറ്റീവ് തേയില ഫാക്ടറിക്ക് മുന്നില്‍ രാവിലെ 10 മുതലാണ് പ്രതിഷേധ സമരം നടക്കുക.
മുനിസിപ്പല്‍ സെക്രട്ടറി എ. രാജേന്ദ്രന്‍ അധ്യക്ഷനാകുന്ന സമരപരിപാടി എം. ദ്രാവിഡമണി എം.എല്‍.എ ഉദ്ഘാടനം ചെയ്യും. എം. പാണ്ഡ്യരാജ് മുഖ്യപ്രഭാഷണം നടത്തും. കോശി ബേബി, എന്‍. വാസു, ബാലകൃഷ്ണന്‍, കെ.പി മുഹമ്മദ്, കെ. സഹദേവന്‍, സാദിക് ബാബു, എ. ലിയാഖത്തലി, അബ്ദുറഹ്മാന്‍, ചെളിവയല്‍ ഷാജി, രാജ്കുമാര്‍ ഗോപി, മുഹമ്മദ് ഖനി, ഗുണശേഖരന്‍, വി.കെ ഹനീഫ, യു.എം.എസ് യൂസുഫ്, സി.എച്ച് ഹനീഫ, തുയില്‍മേഘം, ശിവനാഥന്‍, അബ്ദുല്‍ കാദര്‍ കലീം, ശംസുദ്ദീന്‍ സംസാരിക്കും. മഞ്ചമൂല സുബ്രമണ്യം സ്വാഗതവും ടി. നാഗേശ്വരന്‍ നന്ദിയും പറയും. പച്ചത്തേയിലക്ക് 22 രൂപ തറവില നിശ്ചയിക്കുക, ബിനാമി ഇടപാട് മൂലം മൂല്യമില്ലാത്ത തേയിലപ്പൊടികള്‍ വിപണിയിലിറക്കിയ കാരണം കൊണ്ട് നഷ്ടപ്പെട്ട ഗുണനിലവാരം തിരിച്ച് പിടിക്കുന്നതിന് ബിനാമി ഇടപാടുകാരെ ഒഴിവാക്കുക, 1500ഓളം അംഗങ്ങളുള്ള ഫാക്ടറിയിലെ വരവ് ചെലവ് കണക്കുകള്‍ അവതരിപ്പിക്കുകയും പുരോഗതികള്‍ വിലയിരുത്തുകയും ചെയ്യുക തുടങ്ങിയ ആവശ്യങ്ങള്‍ ഉന്നയിച്ചാണ് ഡി.എം.കെ സമരം നടത്തുന്നത്.