കോഴിക്കോട്: ജില്ലയിലെ കൈയേറ്റ വനഭൂമിയിലെ വനം-റവന്യൂ സംയുക്ത പരിശോധന വേഗത്തില്‍ പൂര്‍ത്തിയാക്കാന്‍ വനം മന്ത്രി അഡ്വ. കെ. രാജു നിര്‍ദേശം നല്‍കി. വിഷയത്തില്‍ മറ്റു ജില്ലകളിലും റവന്യൂ, വനം വകുപ്പ് ഉദ്യോഗസ്ഥരുടെ യോഗം വിളിച്ചുചേര്‍ക്കും.
1977 ജനുവരി ഒന്നിന് മുന്‍പുള്ള വനം കൈയേറ്റങ്ങള്‍ റഗുലറൈസ് ചെയ്യാനും അതിനു ശേഷമുള്ളത് ഒഴിപ്പിക്കാനും സര്‍ക്കാര്‍ നേരത്തെ തീരുമാനിച്ചിട്ടുണ്ട്. ജില്ലയില്‍ പെരുവണ്ണാമൂഴി, കുറ്റ്യാടി, താമരശേരി എന്നിവിടങ്ങളിലാണ് വനം കൈയേറ്റമുള്ളത്.
വനംസംരക്ഷണ നിയമപ്രകാരം റഗുലറൈസ് ചെയ്യാവുന്ന 1977 ജനുവരി ഒന്നിന് മുന്‍പുള്ള വനം കൈയേറ്റ വിസ്തൃതി പെരുവണ്ണാമൂഴി-47 കൈയേറ്റം, 15.30 ഹെക്ടര്‍, കുറ്റ്യാടി-50 കൈയേറ്റം, 22.8085 ഹെക്ടര്‍ എന്നിങ്ങനെ ആകെ 38.1085 ഹെക്ടര്‍ ആണെന്ന് കോഴിക്കോട് ഡി.എഫ്.ഒ അറിയിച്ചു. 1977 ജനുവരി ഒന്നിനു ശേഷമുള്ള വനം കൈയേറ്റം കുറ്റ്യാടി-21, പെരുവണ്ണാമൂഴി-145, താമരശ്ശേരി-94 എന്നിങ്ങനെ ആകെ 264 ആണ്. ഇത് ആകെ 125.315 ഹെക്ടറാണ്.
യോഗത്തില്‍ ജില്ലാ കലക്ടര്‍ യു.വി ജോസ്, വനം വകുപ്പിലെ ഉന്നത ഉദ്യോഗസ്ഥരായ ഇ. പ്രദീപ്കുമാര്‍, എസ്. ഷെയ്ഖ് ഹൈദര്‍ ഹുസൈന്‍, കെ.കെ സുനില്‍കുമാര്‍, പി.കെ ആസിഫ്, ഡെപ്യൂട്ടി കലക്ടര്‍ എല്‍.ആര്‍ റോഷ്‌നി നാരായണന്‍ പങ്കെടുത്തു.