വെഞ്ഞാറമൂട്: രംഗപ്രഭാതിന്റെ സ്ഥാപകന്‍ കെ. കൊച്ചുനാരായണ പിള്ളയുടെ 10ാം ചരമവാര്‍ഷിക ദിനാചരണത്തിന്റെ ഭാഗമായി രംഗപ്രഭാതില്‍ സാംസ്‌കാരിക വകുപ്പിന്റെ സഹകരണത്തോട് കൂടി 25 മുതല്‍ ഒക്‌ടോബര്‍ ഒന്നു വരെ കുട്ടികളുടെ ദേശീയ നാടകോത്സവം നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
25ന് വൈകിട്ട് ആറിന് നാടകോത്സവം ദേവസ്വം മന്ത്രി കടകംപ്പള്ളി സുരേന്ദ്രന്‍ ഉദ്ഘാടനം ചെയ്യും. ഡി.കെ മുരളി എം.എല്‍.എ അധ്യക്ഷനാകും. ലെനിന്‍ രാജേന്ദ്രന്‍ അനുസ്മരണ പ്രഭാഷണം നടത്തും.
തുടര്‍ന്ന് അലിന്തറ കൃഷ്ണപ്പിള്ള രചനയും സംവിധാനവും നിര്‍വഹിച്ച രംഗപ്രഭാതിന്റെ നാടകം പൂവന്‍കോഴി മുട്ടയിട്ടു. 26ന് വൈകിട്ട് ആറിന് കുട്ടികളുടെ നാടക വേദി എന്ന വിഷയത്തില്‍ ഡോ: ആര്‍.ബി രാജലക്ഷ്മി പ്രഭാഷണം നടത്തും. വിജയകുമാര്‍ രചനയും സംവിധാനവും നിര്‍വഹിച്ച തഞ്ചാവൂര്‍ ഉതിരി നാടകനിലയത്തിന്റെ നാടകം വണ്ണത്തെപൂച്ചികളില്‍ ആറ്. 27ന് വൈകിട്ട് ആറിന് നാടകവേദിയും നാട്യധര്‍മിയും എന്ന വിഷയത്തില്‍ ഗിരീഷ് സോപാനം പ്രഭാഷണം നടത്തും.തുടര്‍ന്ന് തൃഷല പട്ടേല്‍ രചനയും സംവിധാനവും നിര്‍വഹിച്ച മുംബൈ റ്റീ പോര്‍ട്ട് പ്രൊഡക്ഷന്‍സിന്റെ നാടകം ദി എക്‌സ്‌ചേഞ്ച് സ്റ്റുഡന്റ്.
28ന് വൈകിട്ട് ആറിന് ആധുനിക മലയാള നാടകവേദി എന്ന വിഷയത്തില്‍ പ്രൊഫ: അലിയാര്‍ പ്രഭാഷണം നടത്തും. രാജേഷ്മണത്തണ സംവിധാനം നിര്‍വഹിച്ച ഇന്റലക്ച്വല്‍ നാടകവേദിയുടെ നാടകം മറുപാട്ട്. രാത്രി 8ഏട്ടിന് മനോജ് നാരായണന്‍ സംവിധാനം ചെയ്ത കോഴിക്കോട് പൂക്കാട് കലാലയത്തിന്റെ നാടകം കിട്ടപുരാണം.
29ന് വൈകിട്ട് ആറിന് അമേറ്റര്‍ തിയറ്റര്‍ എന്ന വിഷയത്തില്‍ ഡോ: രാജാവാര്യര്‍ പ്രഭാഷണം നടത്തും. ജോസ് കല്ലറയ്ക്കല്‍ രചനയും സംവിധാനവും നിര്‍വഹിച്ച കോട്ടയം നവയുഗിന്റെ നാടകം കൂടുമാറ്റം. രാത്രി എട്ടിന് എം.ലക്ഷ്മി കിരണ്‍ സംവിധാനം ചെയ്ത ഹൈദ്രാബാദ് സി.എ.എം.എസിന്റെ നാടകം വെയറീസ് ബാല്യം.
30ന് വൈകിട്ട് ആറിന് നാടകവേദിയും സ്ത്രീയും എന്ന വിഷയത്തില്‍ ജെ.ശൈലജ പ്രഭാഷണം നടത്തും. പ്രേം ഗുപ്ത സംവിധാനം നിര്‍വഹിച്ച ഭോപ്പാല്‍ ചില്‍ഡ്രന്‍സ് തിയറ്റര്‍ അക്കാദമിയുടെ നാടകം ലാലച്ച്ബുരി ബാല.
ഒക്‌ടോബര്‍ ഒന്നിന് വൈകിട്ട് 6.30ന് നടക്കുന്ന സമാപനസമ്മേളനവും കൊച്ചുനാരായണപ്പിള്ള അനുസ്മരണവും ഡോ:എ.സമ്പത്ത് എം.പി ഉദ്ഘാടനം ചെയ്യും. പിരപ്പന്‍കോട് മുരളി അനുസ്മരണപ്രഭാഷണം നടത്തും.
7.30 മുതല്‍ കേന്ദ്ര സാഹിത്യ അക്കാദമി അവാര്‍ഡ് നേടിയ എസ്.ആര്‍ ലാലിന്റെ കുഞ്ഞുണ്ണിയുടെ യാത്ര പുസ്തകം എന്ന നോവലിന്റെ നാടകാവിഷ്‌കാരം നടക്കും.
രംഗപ്രഭാത് അണിയിച്ചൊരുക്കുന്ന ഈ നാടകം അശോക് ശശിയാണ് സംവിധാനം ചെയ്യുന്നത്. വാര്‍ത്താസമ്മേളനത്തില്‍ എസ്.ഹരികൃഷ്ണന്‍,കെ.എസ്.ഗീത,അശോക്ശശി,അനില്‍.എസ്.രംഗപ്രഭാത് പങ്കെടുത്തു.