മുംബൈ: 2008 മലേഗാവ് സ്‌ഫോടനക്കേസില്‍ രണ്ടു പ്രതികള്‍ക്കു കൂടി എന്‍.ഐ.എ കോടതി ജാമ്യം നല്‍കി. ഗൂഢാലോചനാ പ്രതികളായ സുധാകര്‍ ചതുര്‍വേദി, സുധാകര്‍ ദ്വിവേദി എന്നിവര്‍ക്കാണ് ജാമ്യം അനുവദിച്ചത്.

സ്‌ഫോടനം ആസൂത്രണം ചെയ്യാന്‍ വേണ്ടി മറ്റു പ്രതികളോടൊപ്പം ഇവരും സംബന്ധിച്ചുവെന്നാണ് കേസ്. കേസില്‍ പ്രധാന പ്രതികളായ സാധ്വി പ്രജ്ഞാ സിങ് താക്കൂര്‍, കേണല്‍ പ്രസാദ് ശ്രീകാന്ത് പുരോഹിത് എന്നിവര്‍ക്ക് നേരത്തെ ജാമ്യം നല്‍കിയിരുന്നു. ജാമ്യം ലഭിച്ച പുരോഹിത് ജയിലില്‍ നിന്നിറങ്ങി സൈന്യത്തില്‍ ചേരുകയും ചെയ്തു.

മഹാരാഷ്ട്ര നാസിക് ജില്ലയിലെ മലേഗാവില്‍ 2008 സെപ്തംബര്‍ 29നു നടന്ന സ്‌ഫോടനത്തില്‍ ആറു പേര്‍ കൊല്ലപ്പെടുകയും 100 പേര്‍ക്ക് പരുക്കേല്‍ക്കുകയും ചെയ്തിരുന്നു. മോട്ടോര്‍സൈക്കിളില്‍ വച്ച ബോംബ് പൊട്ടിയാണ് സ്‌ഫോടനമുണ്ടായത്.

സംഭവത്തില്‍ പ്രജ്ഞാ സിങ്, പുരോഹിത് അടക്കം 12 പേരെയാണ് അറസ്റ്റ് ചെയ്തത്. മക്കോക്ക, യു.എ.പി.എ അടക്കം ചുമത്തിയാണ് ഇവരെ അറസ്റ്റ് ചെയ്തിരുന്നത്.