ന്യൂഡല്‍ഹി: റോഹിംഗ്യന്‍ അഭയാര്‍ഥി പ്രശ്‌നത്തെ ചൊല്ലി ബി.ജെ.പിയില്‍ അഭിപ്രായ ഭിന്നത. അഭയാര്‍ഥികളെ മാനുഷിക പരിഗണന മുന്‍നിര്‍ത്തി രാജ്യത്തുനിന്ന് പുറത്താക്കരുതെന്ന് ഉത്തര്‍പ്രദേശിലെ സുല്‍ത്താന്‍ പൂരില്‍ നിന്നുള്ള ബി.ജെ.പി നേതാവും കേന്ദ്ര മന്ത്രി മേനക ഗാന്ധിയുടെ മകനുമായ വരുണ്‍ ഗാന്ധി ആവശ്യപ്പെട്ടു. എന്നാല്‍ വരുണിന്റെ അഭിപ്രായം അനവസരത്തിലാണെന്നും രാജ്യസുരക്ഷയാണ് നോക്കേണ്ടതെന്നും കേന്ദ്ര ആഭ്യന്തര സഹമന്ത്രി ഹന്‍സ് രാജ് ആഹിര്‍ വ്യക്തമാക്കി.
നവഭാരത് ടൈംസ് പത്രത്തിലാണ് വരുണ്‍ ഗാന്ധി റോഹിംഗ്യന്‍ വിഷയത്തെക്കുറിച്ച് തന്റെ നിലപാട് വ്യക്തമാക്കിയത്. അഭയാര്‍ഥികള്‍ക്ക് മാനുഷിക പരിഗണന നല്‍കണം. അതിനു പകരം അവരെ തിരിച്ചയക്കുന്നത് ശരിയല്ലെന്നും അദ്ദേഹം വ്യക്തമാക്കുന്നു.
അതേസമയം റോഹിംഗ്യന്‍ അഭയാര്‍ഥികളുടെ കാര്യത്തില്‍ സഹാനൂഭൂതിയുണ്ടെന്നും എന്നാല്‍ രാജ്യസുരക്ഷയെ മുന്‍നിര്‍ത്തി അവരെ പുറത്താക്കണമെന്ന നിലപാടില്‍ മാറ്റമില്ലെന്നും മേനകാ ഗാന്ധിയും വ്യക്തമാക്കി.