ന്യൂഡല്‍ഹി: നോട്ട് നിരോധനം ദുരന്തമായിരുന്നുവെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധി. രാജ്യത്തെ പാവപ്പെട്ടവരുടെ വികാരം മനസിലാക്കാന്‍ പ്രധാനമന്ത്രിയ്ക്ക് സാധിച്ചിട്ടില്ലെന്നും അദ്ദേഹം പറഞ്ഞു.

നോട്ടു നിരോധനം നടപ്പാക്കിയ നവംബര്‍ എട്ട് രാജ്യത്തിനു ദുഃഖദിനമാണ്. അന്നേ ദിവസം കള്ളപ്പണ വിരുദ്ധ ദിനമായിട്ട് ആഘോഷിക്കുകയാണു ബിജെപി. ആഘോഷമാക്കാന്‍ മാത്രമെന്താണുള്ളതെന്ന് എനിക്കു മനസിലാകുന്നില്ലെന്നും രാഹുല്‍ ഗാന്ധി പറഞ്ഞു.

നോട്ട് നിരോധനത്തിന്റെ ഒന്നാം വാര്‍ഷികം കരിദിനമായി ആചരിക്കുന്നതിന്റെ ഭാഗമായി പാര്‍ട്ടി ജനറല്‍ സെക്രട്ടറിമാരുമായുള്ള യോഗത്തില്‍ പങ്കെടുത്തതിനുശേഷം മാധ്യമങ്ങളോടു സംസാരിക്കുകയായിരുന്നു അദ്ദേഹം.

രാജ്യത്തെ തൊഴിലാളി വര്‍ഗത്തിന്റെ വികാരങ്ങളെന്തെന്നു മനസിലാക്കാന്‍ പ്രധാനമന്ത്രിക്കു കഴിയുന്നില്ല. പാവങ്ങള്‍
കടന്നുപോയ വേദനയെക്കുറിച്ചും അദ്ദേഹത്തിനു തിരിച്ചറിയാന്‍ കഴിയില്ല. സത്യം അംഗീകരിക്കാന്‍ ഇപ്പോഴും തയാറല്ല. നോട്ട് അസാധുവാക്കല്‍ ദുരന്തമായിരുന്നുവെന്നും രാഹുല്‍ പറഞ്ഞു.

ജിഎസ്ടി നല്ലൊരു പദ്ധതിയായിരുന്നു. എന്നാല്‍ അത് തെറ്റായ രീതിയിലാണ് നടപ്പിലാക്കിയതെന്നും രാഹുല്‍ കുറ്റപ്പെടുത്തി.