കരുനാഗപ്പള്ളി: കരുനാഗപ്പള്ളി ആലുംകടവ് മൂന്നാംമൂട് ജംക്ഷനില്‍ മൂന്ന് കടകള്‍ക്ക് തീപിടിച്ചു. നിരവധി സാമഗ്രികകള്‍ കത്തിനശിച്ചു.
ആലുംകടവ് തോപ്പില്‍ പാലസില്‍ ഷിഹാബുദ്ദീന്റെ ചോയിസ് ഏജന്‍സീസും, ആദിനാട് കൊച്ചു തറയില്‍ അബ്ദുള്ളകുട്ടിയുടെ ചോയിസ് ട്രഡേഴ്‌സ് ആന്റ് പെയിന്റ് ഹാഡ് വെയര്‍ കടയുമാണ് കത്തി നശിച്ചത്. കഴിഞ്ഞ ദിവസം പുലര്‍ച്ചെ മൂന്ന് മണിയോടെയായിരുന്നു സംഭവം.

കടയില്‍ വില്പനക്കായി വച്ചിരുന്ന ഇന്‍വെര്‍ട്ടര്‍, ഫാന്‍, കമ്പ്യൂട്ടര്‍, മോട്ടോറുകള്‍, ഇലക്ട്രിക്ക് വയറുകള്‍, പെയിന്റുകള്‍, പെയിന്റ് മിക്‌സിംഗ് മെഷീന്‍ തുടങ്ങി നിരവധി സാധനങ്ങള്‍ കത്തിനശിച്ചു. ഏകദേശം 60 ലക്ഷം രൂപയുടെ നഷ്ടം കണക്കാക്കുന്നു.

സംഭവമറിഞ്ഞു കരുനാഗപ്പള്ളിയില്‍ നിന്നും ഫയര്‍‌സ്റ്റേഷന്‍ ഓഫിസര്‍ വിശ്വനാഥിന്റെ നേതൃത്വത്തില്‍ രണ്ട് യൂനിറ്റ് ഫയര്‍ഫോഴ്‌സ് എത്തിയാണ് തീ അണച്ചത്. അട്ടിമറിയാകാനാണ് സാധ്യതയെന്ന് കരുതുന്നു. കടയടച്ച് പോകുമ്പോള്‍ മെയിന്‍ സ്വിച്ചുകള്‍ ഉള്‍പ്പെടെ എല്ലാം ഓഫാക്കി പോകാറാണ് പതിവെന്നും കടയുടമകള്‍ പറയുന്നു.

കൊല്ലത്ത് നിന്നും ഫോറന്‍സിക്, വിരലടയാള വിദഗ്ദര്‍, മറ്റു ഉന്നത ഉദ്യോഗസ്ഥര്‍ എന്നിവരെത്തി തെളിവുകള്‍ ശേഖരിച്ചു. പോലീസിന്റെ നേതൃത്വത്തില്‍ നടക്കുന്ന ശാസ്ത്രീയ പരിശോധനകളുടേയും ഇലക്ട്രിക്കല്‍ ഇന്‍സ്‌പെക്ടറേറ്റ് വിദഗ്ധരുടെയും റിപ്പോര്‍ട്ട് ലഭിച്ച ശേഷമേ തീപിടുത്തത്തിന്റെ യഥാര്‍ത്ഥ കാരണം അറിയാന്‍ കഴിയൂ. കരുനാഗപ്പള്ളി പോലീസ് കേസ്സെടുത്തു അന്വേഷണം ആരംഭിച്ചു.