ഷാര്‍ജ: ശിഹാബ് തങ്ങളെ കുറിച്ചുള്ള പുസ്തകങ്ങള്‍ പ്രകാശനം ചെയ്തു. മലയാളം, അറബിക്, ഇംഗ്ലീഷ് എന്നീ മൂന്ന് ഭാഷകളിലായാണ് ശിഹാബ് തങ്ങളെ കുറിച്ചുള്ള പുസ്തകങ്ങള്‍ പുറത്തിറങ്ങിയിരിക്കുന്നത്. ഷാര്‍ജ പുസ്തകോത്സവ വേദിയില്‍ വച്ചാണ് പ്രകാശനം ചെയ്തിരിക്കുന്നത്.

മലയാളത്തില്‍ ചിത്രകഥാ രൂപത്തിലുള്ള പുസ്തകമായ 'സ്‌നേഹാക്ഷരക്കൂട്ടിലെ ശിഹാബ് തങ്ങള്‍' ഡോ. പി.എ ഇബ്രാഹിം ഹാജിക്കു നല്‍കി ഡോ.എം.കെ മുനീര്‍ പ്രകാശനം ചെയ്തു. മാവേലിക്കര രാജാ രവിവര്‍മ ഫൈന്‍ ആര്‍ട്‌സ് കോളജിലെ വകുപ്പ് തലവന്‍ രഞ്ജിത് ആശയസംയോജനം നടത്തിയ പുസ്തകം എഴുതിയത് ഇ.സാദിഖലിയാണ്.

'സ്‌ലോഗന്‍സ് ഓഫ് ദ് സേജ്' എന്നു പേരിട്ട ഇംഗ്ലീഷ് പുസ്തകം ഇസ്മായില്‍ അല്‍ റൈഫിക്കു നല്‍കി പാണക്കാട് സയ്യിദ് മുനവറലി ശിഹാബ് തങ്ങള്‍ പ്രകാശനം ചെയ്തു. സാഹിത്യകാരനായ മുജീബ് ജയ്ഹൂണ്‍ ആണ് രചയിതാവ്.

അറബിക്കിലുള്ള 'ഫീ ദിഖ്‌രി സയ്യിദ് ശിഹാബ്' എന്ന പുസ്തകം റാഷിദ് അസ്ലമിന് നല്‍കി ഷാര്‍ജ ഇസ്‌ലാമിക് അതോറിറ്റി മേധാവി ഷെയ്ഖ് അബ്ദുല്ല ബിന്‍ മുഹമ്മദ് അല്‍ ഖാസിമി പ്രകാശനം ചെയ്തു. ബഹുഭാഷാ പണ്ഡിതന്‍ കെ.എം അലാവുദ്ദീന്‍ ഹുദവിയാണ് പുസ്തകം എഴുതിയത്.

മുസ്‌ലിം ലീഗ് നേതാക്കളായ സി.പി ബാവഹാജി, എം.എ യൂനുസ് കുഞ്ഞ്, യു.എ.ഇ കെ.എം.സി.സി പ്രസിഡന്റ് ഡോ. പുത്തൂര്‍ റഹ്മാന്‍, ജനറല്‍ സെക്രട്ടറി ഇബ്രാഹിം എളേറ്റില്‍, ദുബൈ കെ.എം.സി.സി ജനറല്‍ സെക്രട്ടറി ഇബ്രാഹിം മുറിച്ചാണ്ടി എന്നിവര്‍ പങ്കെടുത്തു.