കണ്ണൂര്‍: ആത്മകഥയുടെ ആദ്യഭാഗം ഈ മാസം പ്രസിദ്ധീകരിക്കുമെന്ന് സി.പി.എം കേന്ദ്ര കമ്മിറ്റി അംഗം ഇ.പി ജയരാജന്‍. പുസ്തകപ്രസിദ്ധീകരണത്തിന് പാര്‍ട്ടിയുടെ അനുമതി തേടിയതായും ഇ.പി മാധ്യമങ്ങളോടു പറഞ്ഞു. മൂന്നു ഭാഗങ്ങളുള്ള ആത്മകഥയില്‍, പൂര്‍ത്തിയായ ആദ്യ ഭാഗമാണ് ഡിസംബര്‍ അവസാനത്തോടെ പ്രസിദ്ധീകരിക്കുക. പ്രസാധനാവകാശം ഡി.സി ബുക്സിന് നല്‍കില്ലെന്നും ഇ.പി ജയരാജന്‍ വ്യക്തമാക്കി. 

ഒന്നാം ഭാഗം പ്രസിദ്ധീകരിച്ചതിനു ശേഷമാവും രണ്ടും മൂന്നും ഭാഗങ്ങള്‍ എഴുതുക. 'പരിപ്പുവടയും കട്ടന്‍ചായയും' എന്ന പേരായിരിക്കില്ല ആത്മകഥയ്ക്ക്. തന്നെ പരിഹസിക്കാന്‍ മാധ്യമപ്രവര്‍ത്തകര്‍ ഉള്‍പ്പെടെ പ്രയോഗിക്കുന്ന പേരായതിനാലാണ് ശീര്‍ഷകം മാറ്റുന്നതെന്നും പേര് ഇപ്പോള്‍ നിശ്ചയിച്ചിട്ടില്ലെന്നും ഇ.പി പറഞ്ഞു. 

നവംബര്‍ 13ന് വയനാട്, ചേലക്കര ഉപതെരഞ്ഞെടുപ്പ് ദിനത്തിലായിരുന്നു സി.പി.എമ്മിനെ പ്രതിസന്ധിയിലാക്കി ഇ.പിയുടെ ആത്മകഥാ ഭാഗങ്ങള്‍ പുറത്തുവന്നത്. കട്ടന്‍ചായയും പരിപ്പുവടയും എന്ന പേരില്‍ ഇ.പി ജയരാജന്റെ ആത്മകഥ പ്രസിദ്ധീകരിക്കുമെന്ന് ഡിസി ബുക്‌സ് അറിയിച്ചതോടെയായിരുന്നു വിവാദങ്ങളുടെ തുടക്കം. എല്‍.ഡി.എഫ് കണ്‍വീനര്‍ സ്ഥാനത്ത് നിന്ന് മാറ്റിയതിലെ പ്രയാസം പാര്‍ട്ടി മനസ്സിലാക്കിയില്ലെന്നാണ് പുറത്ത് വന്ന ആത്മകഥയുടെ ഭാഗങ്ങളിലെ വിമര്‍ശനം. പാലക്കാട്ടെ ഇടത് സ്ഥാനാര്‍ത്ഥി പി സരിന്‍ വയ്യാവേലിയാകുമെന്നും പരാമര്‍ശമുണ്ടായിരുന്നു.