കൊല്‍ക്കത്ത: മുതിര്‍ന്ന കോണ്‍ഗ്രസ് നേതാവും മുന്‍ കേന്ദ്രമന്ത്രിയുമായ പ്രിയരഞ്ജന്‍ ദാസ് മുന്‍ഷി അന്തരിച്ചു. 2008 മുതല്‍ ഗുരുതരാവസ്ഥയില്‍ ചികിത്സയിലായിരുന്നു അദ്ദേഹം.
ബംഗാള്‍ രാഷ്ട്രീയത്തില്‍ നിന്ന് ദേശീയ രാഷ്ട്രീയത്തിലെത്തിയ അദ്ദേഹം കോണ്‍ഗ്രസിലെ പ്രമുഖ നേതാവായിരുന്നു. ഡല്‍ഹിയിലെ ഇന്ദ്രപ്രസ്ഥ അപ്പോളോ ആശുപത്രിയില്‍ ചികിത്സയിലിക്കെയാണ് മരിച്ചത്.
72 വയസ് പ്രായമുണ്ട്. ഇന്നലെ ഉച്ചയോടെ 12.10നായിരുന്നു അന്ത്യമെന്ന് ഭാര്യ ദീപ ദാസ്മുന്‍ഷി അറിയിച്ചു.
ഹൃദയാഘാതത്തിനു പുറമെ ശരീരത്തിലെ ഒരു ഭാഗം തളരുകയും ചെയ്ത അദ്ദേഹം തലച്ചോറിന്റെ പ്രവര്‍ത്തനം സുഗമമാക്കുന്നതിനായി സ്റ്റെം സെല്‍ തെറാപ്പി നടത്തിയിരുന്നെങ്കിലും ഇത് പ്രായോഗികമായിരുന്നില്ല. 2008 മുതല്‍ അബോധാവസ്ഥയില്‍ കഴിഞ്ഞ ശേഷമായിരുന്നു അന്ത്യം. 1971ലാണ് അദ്ദേഹം ആദ്യമായി പാര്‍ലമെന്റില്‍ എത്തുന്നത്. 2004ലെ ആദ്യ യു.പി.എ സര്‍ക്കാരില്‍ കേന്ദ്ര പാര്‍ലമെന്ററികാര്യ മന്ത്രിയായിരുന്നു. ബംഗാളിലെ റായ്ഗഞ്ച് മണ്ഡലത്തെയായിരുന്നു അദ്ദേഹം ലോക്‌സഭയില്‍ പ്രതിനിധീകരിച്ചിരുന്നത്.
20 വര്‍ഷത്തോളം അഖിലേന്ത്യാ ഫുട്‌ബോള്‍ ഫെഡറേഷന്‍ പ്രസിഡന്റായിരുന്ന ദാസ് മുന്‍ഷി. ലോക കപ്പ് മത്സരത്തില്‍ ഇന്ത്യയില്‍ നിന്നുള്ള ആദ്യ മാച്ച് കമ്മിഷണറായി നിയമിതനായി. ദാസ് മുന്‍ഷിയുടെ നിര്യാണത്തില്‍ രാഹുല്‍ ഗാന്ധി അനുശോചിച്ചു.