വേങ്ങര: പതിനഞ്ചു വര്‍ഷത്തിലധികമായി തരിശുനിലമായി കിടന്ന വലിയോറ പാടത്ത് യുവാക്കള്‍ നെല്‍കൃഷിയിറക്കി. പത്ത് ഏക്കര്‍ സ്ഥലത്താണ് യന്ത്രങ്ങള്‍ ഉപയോഗിച്ച് പൊറ്റേക്കാട് മുജീബ്, മേലയില്‍ അബൂ റിയാസ്, എം.പി.ശിവ പ്രകാശ്, പി.പി.ഷിജീഷ്, പി.പി ദിനേശ്, പാറമ്മല്‍ ഇസ്മായില്‍, പി.പി നാടിക്കുട്ടി, പള്ളിയാളി ഹംസ എന്നിവര്‍ മുണ്ടകന്‍ വിളയിറക്കിയത്. തരിശായി കിടന്ന പാടം പാട്ടത്തിനെടുത്തു. ജലസേചന സൗകര്യമില്ലായ്മ ഉള്‍പ്പെടെ നിരവധി പ്രതികൂല സാഹചര്യങ്ങള്‍ തരണം ചെയ്താണ് കൃഷിയിറക്കിയിരിക്കുന്നത്.
ഉമ, സി.ഒ. ഔഷധ പ്രാധാന്യമുള്ള നവര എന്നീ വിത്തുകളാണ് ഇറക്കിയിട്ടുള്ളത്. തരിശുനിലയത്തില്‍ കൃഷിയിറക്കുന്ന പദ്ധതിയെ പ്രോത്സാഹിപ്പിക്കുന്ന സര്‍ക്കാര്‍ പദ്ധതിയിലേക്ക് സാമ്പത്തിക സഹായത്തിനു അപേക്ഷ നല്‍കിയിട്ടുണ്ട്. അപേക്ഷിച്ച് മുഴുവന്‍ പേര്‍ക്കും ഏക്കറിന് പതിനായിരം രൂപ നല്‍കുമെന്ന് വേങ്ങര കൃഷി ഓഫിസര്‍ എ.നജീബ് പറഞ്ഞു. ഈ വര്‍ഷം 75 ഏക്കറിലധികം വരുന്ന സ്ഥലത്ത് പുതുതായി നെല്‍കൃഷി ആരംഭിച്ചതായും അദ്ദേഹം പറഞ്ഞു.