തിരുവനന്തപുരം: കലിയടങ്ങാതെ കരയിലേക്ക് ആഞ്ഞുവീശിയ കടല്‍ കേരളത്തിന്റെ വികസന പദ്ധതിയായ വിഴിഞ്ഞം അന്താരാഷ്ട്ര തുറമുഖ നിര്‍മാണമേഖലയെയും സ്തംഭിപ്പിച്ചു.

കടലിന്റെ കലിയില്‍നിന്നു കൂറ്റന്‍ യന്ത്രങ്ങള്‍ക്കും രക്ഷപ്പെടാനായില്ല. കടല്‍ കുഴിച്ച് മണല്‍ത്തട്ട് നിരത്തല്‍ ജോലിക്കായെത്തിയ കൂറ്റന്‍ ഡ്രജര്‍ ശാന്തി സാഗര്‍ പത്തിനെ നങ്കൂരം തകര്‍ത്ത് കരയിലേക്ക് വലിച്ചെറിഞ്ഞ തിരകള്‍ കൂറ്റന്‍ ഷോര്‍ലേന്‍ പൈപ്പുകളെയും ഫ്‌ലോട്ടിംഗ് പൈപ്പുകളെയും വളച്ചൊടിച്ചു.

ബര്‍ത്ത് നിര്‍മാണത്തിനായി പൈലിംഗ് നടത്താന്‍ നിര്‍മിച്ച ഉരുക്ക് പ്ലാറ്റ്‌ഫോമും തിരകള്‍ തകര്‍ത്തു. രണ്ടു വര്‍ഷത്തെ അധ്വാനഫലമായി കോരിക്കയറ്റിയ മണലിന്റെ പകുതിയും തിരകള്‍ കവര്‍ന്നെടുത്തു.

മുന്നറിയിപ്പു യഥാസമയം ലഭിക്കാത്തതുകാരണം സുരക്ഷാ മുന്‍കരുതലെടുക്കുന്നതിന് തടസ്സമായതായി അധികൃതര്‍ പറയുന്നു.

ഏതു ദുര്‍ഘട സാഹചര്യങ്ങളെയും അതിജീവിക്കുമെന്നു കരുതിയ അറുന്നൂറ് ടണ്‍ ഭാരമുള്ള ശാന്തി സാഗറാണ് ഒറ്റ രാത്രി കൊണ്ട് നിലംപരിശായത്.

മണലില്‍ ഉറച്ച് കേടുപാടു സംഭവിച്ച ഡ്രജര്‍ നേരെയാക്കണമെങ്കില്‍ ഗുജറാത്തില്‍നിന്ന് സാങ്കേതിക വിദഗ്ധര്‍ എത്തണം.