കാഞ്ഞിരംകുളം: കാഞ്ഞിരംകുളം കൊച്ചുതുറ, പുതിയതുറ മേഖലകളില്‍ നിന്ന് കടലില്‍ പോയി ഇനിയും തിരികെ എത്താനുള്ളത് 26 പേര്‍. ഇന്നലെയും അഞ്ചു മത്സ്യത്തൊഴിലാളികള്‍ തിരിച്ചെത്തിയില്ല എന്ന് കാണിച്ച് ബന്ധുക്കള്‍ നല്‍കിയ പരാതിയില്‍ കാഞ്ഞിരംകുളം പൊലിസ് കേസെടുത്തു. ഇവര്‍ അഞ്ചുപേരും കഴിഞ്ഞമാസം 19നും 20നും കൊച്ചിയില്‍ പോയ ശേഷം മല്‍സ്യബന്ധനത്തിന് കടലില്‍ പേയവരാണ്. ഇന്നലെ പരാതി ലഭിച്ചവരില്‍ വലസ്‌കരന്‍(56), ഇയാളുടെ മകന്‍ സാബിന്‍(18), ഷൈജു(30) ,ജോസ് അടിമ(52), സ്റ്റീഫന്‍ (40) എന്നിവര്‍ തിരികെ എത്തിയിട്ടില്ല.
കാഞ്ഞിരംകുളം പൊലിസ് എടുത്ത 20 കേസുകളില്‍ 26 പേരെയാണ് കണ്ടെത്താനുള്ളത്. ചില കേസുകളില്‍ പിതാവും മകനും ഉള്‍പ്പെടും. ഇനിയും അംഗ സംഖ്യ കൂടുമെന്നാണ് പൊലിസ് നിഗമനം. മല്‍സ്യബന്ധനത്തിന് പോയി ഇരുപതും ഇരുപത്തഞ്ചും ദിവസം കഴിഞ്ഞ ശേഷമേ ഇക്കൂട്ടര്‍ വീടുകളില്‍ തിരിച്ചെത്താറുള്ളു. ഇക്കാരണത്താല്‍ കൂടുതല്‍പേരുടെ മടങ്ങി വരവ് കാത്ത് കഴിയുകയാണ് നിരവധി കുടുംബങ്ങള്‍.