കൊച്ചി: ഓഖി ചുഴലിക്കാറ്റില്‍ പെട്ട് ലക്ഷദ്വീപില്‍ കുടുങ്ങിയ 65 പേരെ കൊച്ചിയിലെത്തിച്ചു. ഇവരില്‍ 14 പേര്‍ മലയാളികളാണ്. മറ്റുള്ളവര്‍ തമിഴ്‌നാട് സ്വദേശികളാണെന്നാണ് റിപ്പോര്‍ട്ട്. ഏഴു ബോട്ടുകളിലായാണ് ഇവരെ കരക്കെത്തിച്ചത്.

ഒമ്പതുപേര്‍ക്ക് പരിക്കുള്ളതിനാല്‍ അവരെ എറണാകുളം ജനറല്‍ ആശുപത്രിയിലേക്ക് മാറ്റി.

ലക്ഷദ്വീപിലെത്തിയ തൊഴിലാളികള്‍ അവിടെ ആശുപത്രിയിലും ദുരിതാശ്വാസകേന്ദ്രങ്ങളിലുമായി കഴിയുകയായിരുന്നു. കടല്‍ ശാന്തമായതോടെ ആരോഗ്യമുള്ളവരെ തീരത്തേക്ക് കയറ്റിവിടുകയാണ് ദ്വീപ് അധികൃതര്‍. സ്വന്തം ബോട്ടുകളില്‍ തന്നെയാണ് ഇവര്‍ തീരമണഞ്ഞത്.

അതേസമയം, കടലില്‍ കാണാതായവര്‍ക്കായുള്ള തിരച്ചില്‍ ഇന്നും തുടരുകയാണ്. വ്യോമസേനയുടെ വിമാനം തിരുവനന്തപുരം പൊഴിയൂരില്‍ നിന്ന് മത്സ്യത്തൊഴിലാളികളെയും കൂട്ടി തെരച്ചിലിനായി പുറപ്പെട്ടു.