ഗാന്ധിനഗര്‍: ഗുജറാത്ത് രണ്ടാം ഘട്ട തെരഞ്ഞെടുപ്പില്‍ വോട്ടിങ് മെഷിന്‍ യഥാര്‍ഥ വില്ലനാകുമോയെന്ന് വോട്ടര്‍മാര്‍ക്ക് ആശങ്ക. ബി.ജെ.പി ഭരണത്തിനെതിരേ പ്രതികരിക്കുന്നവരും മുസ്്‌ലിം വോട്ടര്‍മാരുമാണ് വോട്ടിങ് മെഷീനില്‍ വിശ്വാസ്യതയില്ലെന്ന് ഇതിനകം തന്നെ വ്യക്തമാക്കിയത്. ഒന്നാം ഘട്ട തെരഞ്ഞെടുപ്പില്‍ ഛോട്ടാ ഉദയ്പൂരില്‍ വോട്ടിങ് മെഷിനില്‍ ക്രമക്കേടുണ്ടെന്ന് വോട്ടര്‍മാരും കോണ്‍ഗ്രസും ആരോപിച്ചിരുന്നു.
തങ്ങള്‍ ചെയ്ത വോട്ട് മറ്റൊരാളുടെ ചിഹ്നത്തിലേക്ക് മാറിയെന്ന് വോട്ടര്‍മാര്‍ ആരോപിച്ചിരുന്നു. ഇക്കാര്യം ചൂണ്ടിക്കാട്ടി സാമൂഹിക മാധ്യമങ്ങളില്‍ വ്യാപകമായ പ്രചാരണവും ഉണ്ടായിരുന്നു. സംസ്ഥാനത്ത് കടുത്ത അവഗണന നേരിടുകയും അതേസമയം രണ്ടാം ഘട്ട തെരഞ്ഞെടുപ്പില്‍ നിര്‍ണായക ശക്തി തെളിയിക്കാനും കഴിയുന്ന മുസ്്‌ലിം, ദലിത്-പിന്നാക്ക വിഭാഗം ജനങ്ങള്‍ക്കിടയിലേക്ക് കടന്നുകയറാന്‍ ഇതുവരെ ബി.ജെ.പിക്ക് കഴിഞ്ഞിട്ടില്ല.