കൊല്ലം: റെയില്‍വേ സ്റ്റേഷന്‍ മാര്‍ച്ചിനിടെ ജൂനിയര്‍ എസ്.ഐക്ക് ഡി.വൈ.എഫ്.ഐ നേതാവിന്റെ പരസ്യ മര്‍ദനം. മെമു പാസഞ്ചര്‍ ട്രെയ്‌നുകള്‍ റദ്ദാക്കിയതില്‍ പ്രതിഷേധിച്ച് ഡി.വൈ.എഫ്.ഐ കഴിഞ്ഞ ദിവസം നടത്തിയ റെയില്‍വേ സ്റ്റേഷന്‍ മാര്‍ച്ചിനിടെയായിരുന്നു ഈസ്റ്റ് സ്റ്റേഷനിലെ എസ്.ഐ ജിജുവിന് മര്‍ദനമേറ്റത്.
സ്റ്റേഷന് മുന്‍പില്‍ മാര്‍ച്ച് തടയാന്‍ വന്‍ പൊലിസ് സന്നാഹത്തെ വിന്യസിച്ചിരുന്നു. മാര്‍ച്ച് തടഞ്ഞയുടന്‍ പൊലിസും പ്രവര്‍ത്തകരും തമ്മില്‍ ഏറെനേരം ഉന്തും തള്ളും നടന്നു. ഇതിനിടെ വനിതാ പ്രവര്‍ത്തകയെ തടഞ്ഞുവച്ചെന്നാരോപിച്ചാണ് പ്രവര്‍ത്തകര്‍ പ്രകോപനമുണ്ടാക്കിയത്. ഇതേസമയം മറ്റൊരു വിഭാഗം പ്രവര്‍ത്തകര്‍ പ്ലാറ്റ്‌ഫോമുകളില്‍ സംഘടിച്ചിരുന്നു. പുറത്ത് ധര്‍ണ നടക്കുന്ന സമയത്തുതന്നെ അകത്ത് പ്രവര്‍ത്തകര്‍ ട്രെയിന്‍ തടഞ്ഞിട്ടു. എന്നാല്‍, ഇങ്ങനെയൊരു സംഭവം ഉണ്ടായിട്ടില്ലെന്ന നിലപാടിലാണ് ഈസ്റ്റ് പൊലിസ്. സംഭവത്തില്‍ ആര്‍ക്കെതിരെയും കേസെടുത്തിട്ടില്ല.