അബൂദബി; വിദ്യാർഥികളുടെയും 21 വയസ്സിനു താഴെയുള്ള ഗവേഷകരുടെയും പേറ്റൻ്റ് റജിസ്ട്രേഷൻ ഫീസ് ഒഴിവാക്കി യുഎഇ. പേറ്റന്റിന് അപേക്ഷിക്കുന്നവരെ പ്രോത്സാഹിപ്പിക്കുന്നതിനും, പ്രാദേശിക, രാജ്യാന്തര തലങ്ങളിൽ യുഎഇയുടെ മത്സരക്ഷമത വർധിപ്പിക്കുന്നതു ലക്ഷ്യമിട്ടാണ് ഫീസ് റദ്ദാക്കിയതെന്നും സാമ്പത്തിക മന്ത്രാലയം അറിയിച്ചു.

അതേസമയം, പുതിയ പേറ്റൻ്റ് റജിസ്‌റ്റർ ചെയ്യുന്നതിനുള്ള സമയപരിധി 42 മാസത്തിൽ നിന്ന് 6 മാസമാക്കി കുറച്ചു. 'പേറ്റൻ്റ് ഹൈവ്' എന്ന പദ്ധതി തയാറാക്കിയാണ് റജിസ്ട്രേഷൻ ത്വരിതപ്പെടുത്തുന്നത്. 4,481 പേറ്റൻ്റുകളാണ് നിലവിൽ റജിസ്റ്റർ ചെയ്യുന്നത്, 2026നകം ഇത് 6,000 ആക്കി ഉയർത്താമെന്നാണ് പ്രതീക്ഷിക്കുന്നത്.

ബൗദ്ധിക സ്വത്തവകാശത്തിൻ്റെ പ്രാധാന്യത്തെക്കുറിച്ച് അവബോധം വളർത്തുന്നതിനായി ലോക ബൗദ്ധിക സ്വത്തവകാശ സംഘടനയുമായി (ഡബ്ല്യുഐപിഒ) സഹകരിച്ച് സാമ്പത്തിക മന്ത്രാലയം പരിശീലനം നൽകും. പേറ്റൻ്റ് ഹൈവ് പദ്ധതി യുഎഇയെ ഗ്ലോബൽ ഇന്നവേഷൻ സൂചിക പ്രകാരമുള്ള ലോകത്തിലെ മികച്ച 15 രാജ്യങ്ങളിലൊന്നാക്കി മാറ്റുമെന്ന് സാമ്പത്തിക മന്ത്രാലയം അണ്ടർ സെക്രട്ടറി അബ്‌ദുല്ല അഹമ്മദ് അൽ സാലിഹ് വ്യക്തമാക്കി.

The UAE has announced the exemption of patent registration fees for individuals under the age of 21, aiming to encourage innovation and entrepreneurship among youth.