ക്രിസ്റ്റ്യാനോ റൊണാള്‍ഡോ നേടിയ ഏക ഗോളില്‍ ഗ്രെമിയോയെ 1-0ത്തിന് വീഴ്ത്തി റയല്‍ മാഡ്രിഡ് ക്ലബ് ലോകകപ്പ് കിരീടം മൂന്നാം തവണയും സ്വന്തമാക്കി
അബൂദബി: രണ്ടാം പകുതിയില്‍ ക്രിസ്റ്റ്യാനോ നോടിയ ഫ്രീ കിക്ക് ഗോളിന്റെ ബലത്തില്‍ റയല്‍ മാഡ്രിഡ് ഫിഫ ക്ലബ് ലോകകപ്പ് കിരീടം നിലനിര്‍ത്തി. ഫൈനലില്‍ ബ്രസീലിയന്‍ ടീം ഗ്രമിയോയെ 1-0ത്തിന് പരാജയപ്പെടുത്തിയാണ് റയലിന്റെ നേട്ടം. കിരീടം മൂന്നാം തവണ സ്വന്തമാക്കി റയല്‍ ചിരവൈരികളായ ബാഴ്‌സലോണയുടെ ഏറ്റവും കൂടുതല്‍ ക്ലബ് ലോകകപ്പ് നേട്ടമെന്ന റെക്കോര്‍ഡിനൊപ്പമെത്തുകയും ചെയ്തു. നാല് വര്‍ഷത്തിനിടെയാണ് റയല്‍ മൂന്ന് ക്ലബ് ലോകകപ്പുകളില്‍ മുത്തമിടുന്നത്. 2017ല്‍ റയല്‍ സ്വന്തമാക്കുന്ന അഞ്ചാം കിരീടമാണിത്. നേരത്തെ ലാ ലിഗ, ചാംപ്യന്‍സ് ലീഗ്, യുവേഫ സൂപ്പര്‍ കപ്പ്, സ്പാനിഷ് സൂപ്പര്‍ കപ്പ് കിരീടങ്ങളും ഈ വര്‍ഷം റയല്‍ ഷോക്കേസിലെത്തിച്ചിരുന്നു.
കോപ്പ ലിബര്‍ട്ടഡോറസ് കിരീടം മൂന്നാം തവണയും സ്വന്തമാക്കിയാണ് ഗ്രെമിയോ ക്ലബ് ലോകകപ്പിനെത്തിയത്. പന്തടക്കത്തിലും ആക്രമണത്തിലും റയല്‍ മുന്നില്‍ നിന്നെങ്കിലും പഴുതുകളടച്ച പ്രതിരോധവുമായി ഗ്രെമിയോ നിലയുറപ്പിച്ചതോടെ ആദ്യ പകുതി ഗോള്‍രഹിതമായി തീര്‍ന്നു. രണ്ടാം പകുതി തുടങ്ങി 53ാം മിനുട്ടിലാണ് ക്രിസ്റ്റ്യാനോ റൊണാള്‍ഡോയുടെ ഫ്രീ കിക്കിലൂടെ റയല്‍ മത്സരം തങ്ങള്‍ക്കനുകൂലമാക്കി മാറ്റിയത്. ഈ സീസണില്‍ വിവിധ ടൂര്‍ണമെന്റുകളിലായി 20 മത്സരങ്ങളില്‍ നിന്ന് ക്രിസ്റ്റ്യാനോ റയലിനായി നേടുന്ന 15ാം ഗോളായിരുന്നു ഫ്രീ കിക്കിലൂടെ പിറന്നത്. ആതിഥേയരായ അല്‍ ജസീറയെ 1-4ന് പരാജയപ്പെടുത്തി മെക്‌സിക്കന്‍ ടീം പചുക്ക മൂന്നാം സ്ഥാനം സ്വന്തമാക്കി.