നിബിന്‍ കള്ളിക്കാട്

വരിവരിയായി വെടിയുണ്ടമഴകള്‍
ജീവനിലേക്കു കുതിക്കുന്ന യുദ്ധം,
കൊല്ലപ്പെട്ടവര്‍ കാരണമറിയാതെ
നിശബ്ദം കരയുന്ന രണ്ടു രാജ്യങ്ങള്‍,
പീരങ്കികള്‍ പൊട്ടിക്കരഞ്ഞുകൊണ്ട്
തീപ്പക്ഷികളെ പ്രസവിക്കുന്നുണ്ട്.

തിരിച്ചറിയാത്ത മൃതശരീരത്തില്‍
കുപ്പായക്കീശയിലെഴുതിവച്ച
മോഹങ്ങളുടെ കടലാസുതുണ്ടുകള്‍,
ഓരോന്നിലും വീട്ടില്‍ വിശപ്പോടെ
നിലവിളിക്കുന്ന പിഞ്ചുമക്കളുടെ
ഇഷ്ടവിഭവങ്ങള്‍.

ഇനിയാരും കാത്തിരിക്കാനില്ലെന്ന്
മൃതിയടഞ്ഞ കണ്ണുകളിലവസാന
കാഴ്ച കണ്ണീരില്‍ ഒസ്യത്തെഴുതുന്നു,
മൗനമുറഞ്ഞുപോയ മനസില്‍
ഞാനും നിങ്ങളുമതനുഭവങ്ങളില്‍
വായിക്കാതെ ടി.വി ചാനല്‍ മാറ്റുന്നു.