നിര്‍മ്മിത ബുദ്ധിയില്‍ ആഴത്തിലുള്ള ഗവേഷണങ്ങള്‍ നടക്കുന്ന സമീപകാലത്ത് മേഖലയുമായി ബന്ധപ്പെട്ട തന്റെ പദ്ധതികള്‍ തുറന്ന് പറഞ്ഞ് മെറ്റ സി.ഇ.ഒ മാര്‍ക്ക് സക്കര്‍ബര്‍ഗ്. മനുഷ്യനെ ബുദ്ധിശക്തിയില്‍ മറികടക്കുന്ന ആര്‍ട്ടിഫിഷ്യല്‍ ജനറല്‍ ഇന്റലിജന്‍സ് വികസിപ്പിക്കാന്‍ താത്പര്യമുണ്ടെന്നാണ് സക്കര്‍ബര്‍ഗ് ത്രെഡ്‌സില്‍ പങ്കുവെച്ച വീഡിയോയിലൂടെ അറിയിച്ചിരിക്കുന്നത്. കൂടാതെ ഇത്തരം ടെക്ക്‌നോളജികള്‍ ഓപ്പണ്‍ സോഴ്‌സ് ചെയ്യുമെന്നും, പൊതുജനങ്ങള്‍ക്ക് ഇവ വേഗത്തില്‍ ലഭ്യമാക്കുമെന്നും അദേഹം കൂട്ടിച്ചേര്‍ത്തു.

ഓപ്പണ്‍ എഐ, ഗൂഗിള്‍, മെറ്റ തുടങ്ങിയ കമ്പനികള്‍ ജനറേറ്റീവ് എഐ രംഗത്ത് വന്‍ തുക മുതല്‍മുടക്കുന്ന സാഹചര്യത്തിലാണ് സക്കര്‍ബര്‍ഗിന്റെ ഈ വാക്കുകള്‍. മുമ്പ് ഓപ്പണ്‍ എഐ സിഇഒ സാം ഓള്‍ട്ട്മാനും തങ്ങളുടെ എജി ഐ തികളെകുറിച്ച് സംസാരിച്ചിരുന്നു.
എഐ ഗവേഷണ രംഗത്ത് വലിയ നിക്ഷേപമാണ് മെറ്റ നടത്തിവരുന്നത്. ഈ വര്‍ഷം അവസാനത്തോടെ 3.5 ലക്ഷം എച്ച് 100 എന്‍വിഡിയ ഗ്രാഫിക് പ്രൊസസിങ് യൂണിറ്റുകള്‍ ഇതിനായി ഒരുക്കാനും കമ്പനി പദ്ധതിയിടുന്നുണ്ട്.

ലാര്‍ജ് ലാംഗ്വേജ് മോഡലുകളെ കൂടുതല്‍ ശക്തരാക്കാനുള്ള പദ്ധതികളാണ് കമ്പനികള്‍ ആസൂത്രണം ചെയ്യുന്നത്. ഡിസംബറിലാണ് ഗൂഗിള്‍ ജെമിനി എ എന്നുള്ള പേരില്‍ പുതിയ ലാര്‍ജ് ലാംഗ്വേജ് മോഡലുകള്‍ കമ്പനി അവതരിപ്പിച്ചത്.
ലാമ 2 എന്ന പേരില്‍ മെറ്റയും പുതിയ എല്‍എല്‍എം അവതരിപ്പിച്ചു.

എന്നാല്‍ ഇത്തരം പരീക്ഷണങ്ങള്‍ പുരോഗമിക്കുമ്പോഴും ആര്‍ട്ടിഫിഷ്യല്‍ ജനറല്‍ ഇന്റലിജന്‍സിന്റെ മുന്നേറ്റം ഭാവിയില്‍ മനുഷ്യര്‍ക്ക് തന്നെ ദോഷകരമായി ഭവിച്ചേക്കാം എന്ന മുന്നറിയിപ്പും പലരും നല്‍കുന്നുണ്ട്.

Content Highlights:Mark Zuckerbergs new goal is creating artificial general intelligence