ട്രംപിന്റെ 'അപരാജിത' ഓട്ടത്തിനൊരു തിരിച്ചടി; വാഷിങ്ടണ്‍ ഡി.സിയില്‍ നിക്കി ഹാലിക്ക് ജയം

വാഷിങ്ടണ്‍: യു.എസ് പ്രസിഡന്റ് സ്ഥാനത്തേക്ക് റിപ്പബ്ലിക്കന്‍ പാര്‍ട്ടിയുടെ സ്ഥാനാര്‍ഥിയാകാനുള്ള പ്രാഥമിക മത്സരത്തില്‍ നിക്കി ഹാലിക്ക് ആദ്യ വിജയം. വാഷിങ്ടണ്‍ ഡിസിയിലെ മത്സരത്തിലാണ് മുന്‍ പ്രസിഡന്റ് ഡോണള്‍ഡ് ട്രംപിനെ നിക്കി ഹാലി അട്ടിമറിച്ചത്. ട്രംപിന്റെ തുടര്‍ച്ചയായ വിജയങ്ങള്‍ക്കിടെയുള്ള ആദ്യ പരാജയമാണിത്.

ട്രംപിന്റെ മുഖ്യ എതിരാളിയായ നിക്കി ഹാലിക്ക് സ്വന്തം സ്റ്റേറ്റായ സൗത് കരോലൈനയില്‍ പോലും വിജയിക്കാന്‍ കഴിഞ്ഞിരുന്നില്ല. കഴിഞ്ഞ മത്സരങ്ങളിലെല്ലാം ട്രംപാണ് വിജയിച്ചിരുന്നത്. കഴിഞ്ഞ ദിവസം മിസൂറി, മിഷിഗന്‍, ഇഡാഹോ സ്റ്റേറ്റുകളില്‍ നടന്ന പ്രാഥമിക മത്സരത്തിലും ട്രംപ് വിജയിച്ചിരുന്നു.

15 സ്റ്റേറ്റുകളിലേക്ക് തെരഞ്ഞെടുപ്പ് നടക്കുന്ന 'സൂപ്പര്‍ ചൊവ്വ'യിലേക്ക് അദ്ദേഹത്തിന് ആത്മവിശ്വാസത്തോടെ നോക്കാം. ചൊവ്വാഴ്ചയോടെ മത്സരരംഗത്തെ ചിത്രം തെളിയും. അതേ സമയം, നിക്കിയെ സംബന്ധിച്ച് അവസാന പ്രതീക്ഷയാണ് 'സൂപ്പര്‍ ചൊവ്വ'.

നവംബറില്‍ നടക്കുന്ന അമേരിക്കന്‍ പ്രസിഡന്റ് തെരഞ്ഞെടുപ്പില്‍ ട്രംപ് തന്നെ റിപ്പബ്ലിക്കന്‍ സ്ഥാനാര്‍ഥിയാകാനാണ് സാധ്യത. ഡെമോക്രാറ്റുകള്‍ നിലവിലെ പ്രസിഡന്റ് ജോ ബൈഡനെ തന്നെ രംഗത്തിറക്കും.