കൊച്ചി: കൊവിഡ് വാക്‌സിന്റെ പേരിലും തട്ടിപ്പിനു ശ്രമം. വാക്‌സിനെടുക്കാന്‍ രജിസ്റ്റര്‍ ചെയ്യണമെന്നാവശ്യപ്പെട്ടാണ് ഫോണിലേക്ക് വിളിയെത്തുക. ഇതിനായി ആധാര്‍ നമ്പര്‍, ഇ മെയില്‍ വിലാസം അടക്കമുള്ള വിവരങ്ങളാണ് തട്ടിപ്പുസംഘങ്ങള്‍ തേടുന്നത്. ആധാര്‍ നമ്പര്‍ നല്‍കുന്നവര്‍ക്ക് രജിസ്‌ട്രേഷന്‍ നടപടിയുടെ ഭാഗമായി ഫോണിലേക്ക് ഒ.ടി.പി അയയ്ക്കുകയും ഇവ ചോദിക്കുകയും ചെയ്യും. ഇതുവഴിയാണ് പണം തട്ടുന്നത്.

ഒ.ടി.പി നല്‍കുന്ന ഉടന്‍ ആധാര്‍ നമ്പര്‍ ലിങ്ക് ചെയ്ത ബാങ്ക് അക്കൗണ്ടില്‍നിന്ന് പണം നഷ്ടപ്പെടും. മുംബൈയില്‍ സമാന സംഭവം നടക്കുകയും പൊലിസ് ജാഗ്രതാനിര്‍ദേശം നല്‍കുകയും ചെയ്തിരുന്നു. തുടര്‍ന്നാണ് കേരള പൊലിസ് ബോധവല്‍കരണവുമായി രംഗത്തെത്തിയത്. കൊവിഡ് വാക്‌സിന്‍ സംബന്ധിച്ച് ഇ മെയിലിലും മൊബൈല്‍ ഫോണിലും എത്തുന്ന ലിങ്കുകള്‍ തുറക്കരുത്. സന്ദേശങ്ങള്‍ക്കും ഫോണ്‍വിളികള്‍ക്കും മറുപടി നല്‍കരുതെന്നും പൊലിസ് പറയുന്നു.