തിരുവനന്തപുരം: കാമ്പസുകളില്‍ തീവ്രവാദ, വര്‍ഗീയ, മദ്യമയക്കുമരുന്നു ശക്തികള്‍ പിടിമുറുക്കുന്നതിനെതിരെ വിദ്യാര്‍ഥി സമൂഹം ജാഗ്രത പാലിക്കണമെന്ന് മുഖ്യമന്ത്രി പിണറായി വിജയന്‍ .
കേന്ദ്രീയ വിദ്യാലയ സംഗതന്റെ ആഭിമുഖ്യത്തില്‍ സംഘടിപ്പിച്ച റീജ്യണല്‍ യൂത്ത് പാര്‍ലമെന്റ് 2016   17 ഉദ്ഘാടനം ചെയ്തുസംസാരിക്കുകയായിരുന്നു മുഖ്യമന്ത്രി. വിദ്യാര്‍ഥി രാഷ്ട്രീയം നിരോധിച്ചാല്‍ എല്ലാം ഭദ്രവും സ്വസ്ഥവുമാകുമെന്ന് ചിലര്‍ പ്രവചിച്ചിരുന്നു. എന്നാല്‍, അരാഷ്ട്രീയമായ കാമ്പസുകളില്‍ തീവ്രവാദ സംഘടനകള്‍, വര്‍ഗീയ ശക്തികള്‍, ജാതി സംഘടനകള്‍, മദ്യമയക്കുമരുന്ന് മാഫിയ തുടങ്ങിയവര്‍ പിടിമുറുക്കിയിരിക്കുകയാണ്. ഇതിനെതിരെ വിദ്യാര്‍ഥി സമൂഹം ജാഗ്രത പാലിച്ച് ചുറ്റുമുള്ള സംഭവങ്ങള്‍ക്ക് നേരെ കണ്ണും കാതും തുറന്നുവെക്കണം. സമൂഹത്തിന് ഗുണപരമായ രാഷ്ട്രീയ ബോധം ഉയര്‍ന്നുവരേണ്ടതുണ്ടെന്നും അദ്ദേഹം പറഞ്ഞു.  ചടങ്ങില്‍ ഡോ. ശശി തരൂര്‍ എം.പി അധ്യക്ഷനായി.  സി.പി. നാരായണന്‍ എം.പി, ഒ. രാജഗോപാല്‍ എം.എല്‍.എ എന്നിവര്‍  സംസാരിച്ചു.  കേന്ദ്രീയ വിദ്യാലയ സംഗതന്‍ ഡെപ്യൂട്ടി കമ്മീഷണര്‍ ഡോ. ഉമാ ശിവരാമന്‍ സ്വാഗതവും ആക്കുളം കേന്ദ്രീയ വിദ്യാലയ പ്രിന്‍സിപ്പല്‍ ജോസ് മാത്യു നന്ദിയും പറഞ്ഞു. പാങ്ങോട്, അടൂര്‍ ഷിഫ്റ്റ് വണ്‍, കൊച്ചി നേവല്‍ ബേസ് , പാലക്കാട്, കാസര്‍കോട് കേന്ദ്രീയ വിദ്യാലയങ്ങളിലെ എട്ടുമുതല്‍ പ്ലസ് ടു വരെയുള്ള വിദ്യാര്‍ഥികളാണ് റീജ്യണല്‍ യൂത്ത് പാര്‍ലമെന്റില്‍ പങ്കെടുത്തത്.