പൂച്ചാക്കല്‍: ആയുധങ്ങളുമായി ബൈക്കില്‍ സഞ്ചരിച്ച നാലു യുവാക്കള്‍ പൊലീസ് പിടിയിലായി. രണ്ടുപേര്‍ ഓടി രക്ഷപ്പെട്ടു.
പള്ളിപ്പുറം അഖില്‍ നിവാസില്‍ അഖില്‍ വിജയന്‍ (ഉണ്ണി - 28) കരിനാട്ടില്‍ മഹേഷ് (27) കോച്ചേരിമഠത്തില്‍ വിമല്‍ദേവ് (29) ചാണിവെളി നവീന്‍ (23) എന്നിവരാണ് പിടിയിലായത്. ഇവരില്‍ നിന്നും മൂന്നു വാളുകള്‍ പൊലീസ് പിടിച്ചെടുത്തു. ആക്രമണ ലക്ഷ്യത്തോടെയാണ് ആയുധങ്ങള്‍ കരുതിയതെന്നും ഇവര്‍ക്കൊപ്പമുണ്ടായിരുന്ന കണ്ടാലറിയാവുന്ന രണ്ടുപേര്‍ക്കെതിരെ കേസ് എടുത്തതായും ചേര്‍ത്തല എസ്‌ഐ എ.വി. സൈജു പറഞ്ഞു. പള്ളിപ്പുറം ഭാഗത്ത് പൊലീസ് പട്രോളിങിനിടെ ഇവരെ കണ്ട് സംശയം തോന്നിയതിനെ തുടര്‍ന്ന് നടത്തിയ പരിശോധനയിലാണ് ആയുധങ്ങള്‍ കണ്ടെടുത്തത്. നാലുപേരെയും ചേര്‍ത്തല കോടതിയില്‍ ഹാജരാക്കി റിമാന്‍ഡ് ചെയ്തു.