ആലപ്പുഴ: ജില്ലയുടെ 47-ാമത് ജില്ലാ കളക്ടറായി വീണ എന്‍. മാധവന്‍ ചുമതലയേറ്റു. കൊല്ലം സ്വദേശിയാണ്. 2010  ഐ.എ.എസ്. ബാച്ചില്‍പ്പെട്ട വീണ കണ്ണൂര്‍ അസിസ്റ്റന്റ് കളക്ടര്‍, മാനന്തവാടി സബ്കളക്ടര്‍, വാണിജ്യനികുതി വകുപ്പ് ജോയിന്റ് കമ്മീഷണര്‍ എന്നീ സ്ഥാനങ്ങള്‍ വഹിച്ചിട്ടുണ്ട്. ജില്ലാ കളക്ടര്‍ ആര്‍. ഗിരിജ ഇന്നലെ രാവിലെ 9.45ന് ചുമതല പുതിയ കലക്ടര്‍ക്ക് കൈമാറി.
സര്‍ക്കാരിന്റെ പദ്ധതികള്‍ സമയബന്ധിതമായി നടപ്പിലാക്കുന്നതിന് പ്രത്യേക ശ്രദ്ധ നല്‍കുമെന്ന് ചുമതലയേറ്റശേഷം കളക്ടര്‍ പറഞ്ഞു. ജനങ്ങളുടെ ആവശ്യങ്ങള്‍ മുന്നില്‍കണ്ടുള്ള വികസനപദ്ധതികള്‍ നടപ്പാക്കും. ജനപ്രതിനിധികള്‍, സന്നദ്ധസംഘടനകള്‍ തുടങ്ങിയവരുമായി സഹകരിച്ച് ജില്ലയുടെ വികസന പദ്ധതികളുമായി മുന്നോട്ടുപോകും.