ന്യൂഡല്‍ഹി: ഗ്രൂപ്പുകളുടെ സമ്മര്‍ദ്ദങ്ങള്‍ക്ക് വഴങ്ങാതെ കെ.പി.സി.സി പുനഃസംഘടനയുമായി മുന്‍നിശ്ചയപ്രകാരം മുന്നോട്ടുപോകാന്‍ കെപിസിസിക്ക് ഹൈക്കമാന്റിന്റെ അനുമതി. കെപിസിസി പ്രസിഡന്റ് വി.എം സുധീരന്‍ രാഹുല്‍ ഗാന്ധിയുമായി നടത്തിയ ചര്‍ച്ചയെ തുടര്‍ന്നാണ് തീരുമാനം. തെരഞ്ഞെടുപ്പിനുള്ള ഉന്നതാധികാര സമിതിക്ക് ഉടന്‍ രൂപം നല്‍കും.



സംഘടനാ തെരഞ്ഞെടുപ്പിനു മുന്‍പ് പുനസംഘടന വേണ്ടെന്നായിരുന്നു എ,ഐ ഗ്രൂപ്പുകളുടെ ആവശ്യം. എന്നാല്‍ ഇത് അംഗീകരിക്കാനാകില്ലെന്ന് ഹൈക്കമാന്റ് വ്യക്തമാക്കി.

പുനസംഘടനയുമായി മുന്നോട്ടുപോകുകയാണെങ്കില്‍ കെപിസിസി പ്രസിഡന്റിനെ മാറ്റണം എന്ന് ഗ്രൂപ്പ് നേതാക്കള്‍ ഹൈക്കമാന്റിനോട് ആവശ്യപ്പെട്ടിരുന്നു. എന്നാല്‍ മുന്‍ മുഖ്യമന്ത്രി ഉമ്മന്‍ചാണ്ടിയും പ്രതിപക്ഷ നേതാവ് രമേശ് ചെന്നിത്തലയും വിഎം സുധീരനും രാഹുല്‍ ഗാന്ധിയുമായി ചര്‍ച്ച നടത്തി എടുത്ത തീരുമാനത്തില്‍നിന്ന് പിന്നോട്ടു പോകേണ്ടതില്ല എന്നാണ് ഹൈക്കമാന്റ് തീരുമാനം.



കേരളത്തില്‍ ഗ്രൂപ്പ് അതിപ്രസരം ശക്തമാണെന്നും അത് പാര്‍ട്ടിയെ കാര്യമായി ബാധിച്ചിരിക്കുകയാണെന്നും സുധീരന്‍ രാഹുല്‍ ഗാന്ധിയെ ധരിപ്പിച്ചു. തെരഞ്ഞെടുപ്പുകളില്‍ പാര്‍ട്ടിയുടെ വന്‍ തോല്‍വിക്കു കാരണം ഗ്രൂപ്പ് അതിപ്രസരം തന്നെയാണെന്ന സുധീരന്റെ വാദം കൂടി പരിഗണിച്ചാണ് ഹൈക്കമാന്റ് തീരുമാനം.