ന്യൂഡൽഹി: നഷ്ടത്തിൽ തുടരുന്ന മൊബൈൽ സേവന ദാതാക്കളായ വോഡഫോൺ ഐഡിയ ഈ വർഷവും നിരക്കുകൾ വർധിപ്പിച്ചേക്കും. വോഡഫോണ്‍ ഐഡിയ(വി.ഐ) ഈ വര്‍ഷം താരിഫ് ഉയര്‍ത്തുമെന്ന് വിഐ ചീഫ് എക്സിക്യൂട്ടീവ് ഓഫീസര്‍ (സി.ഇ.ഒ) രവീന്ദര്‍ ടക്കര്‍ അറിയിച്ചു.

 

നവംബറിൽ വർധിപ്പിച്ച നിരക്കുകളോട് ഉപഭോക്താക്കൾ എങ്ങനെ പ്രതികരിക്കുന്നുവെന്ന് നോക്കി മാത്രമേ ഈ വർഷം നിരക്കുകൾ വർധിക്കുകയുള്ളൂവെന്ന് കമ്പനിയുടെ മുതിർന്ന ഉദ്യോഗസ്ഥൻ വാർത്ത ഏജൻസി പി.ടി.ഐ യോട് പറഞ്ഞു.

പ്രതിമാസ സേവനങ്ങൾക്ക് നിശ്ചയിച്ച 99 രൂപയെന്ന മിനിമം നിരക്ക് 4 ജി സേവനങ്ങൾ ഉപയോഗിക്കുന്നവരെ സംബന്ധിച്ചിടത്തോളം വലിയ തുകയല്ലെന്ന് വോഡഫോൺ ഐഡിയ എം.ഡിയും സി.ഇ.ഓ യുമായ രവീന്ദർ ടക്കർ പറഞ്ഞു. നിരക്ക് വർധനയെത്തുടർന്ന് കമ്പനിയുടെ ഉപയോക്താക്കളുടെ എണ്ണം 26.98 കോടിയിൽ നിന്നും കഴിഞ്ഞ വർഷം 24.72 ആയി കുറഞ്ഞിരുന്നു. 4,532.1 കോടി രൂപയുടെ നഷ്ടമാണ് ഈ കാലയളവിൽ കമ്പനിക്കുണ്ടായത്.