മസ്‌കറ്റ്: ഒമാനിൽ കൊവിഡ് കേസുകൾ വർധിച്ച് വരുന്ന സാഹചര്യത്തിൽ കൂടുതൽ നിയന്ത്രണങ്ങൾ ഏർപ്പെടുത്താൻ ആഭ്യന്തര മന്ത്രി സയ്യിദ് ഹമൂദ് ബിൻ ഫൈസൽ അൽ ബുസൈദിയുടെ അധ്യക്ഷതയിൽ ബുധനാഴ്ച ചേർന്ന സുപ്രിം കമ്മിറ്റി യോഗം തീരുമാനിച്ചു. രാജ്യത്ത്‌ പ്രവേശിക്കുന്നവരെല്ലാം ഇന്സ്ടിട്യൂഷൻ ക്വാറന്റീനിൽ പ്രവേശിക്കണമെന്നതാണ് പ്രധാന നിബന്ധന.ഇതിന്റെ ചിലവ് യാത്രക്കാർ സ്വയം വഹിക്കണം.

 

ഫെബ്രുവരി 11 വ്യാഴാഴ്ച മുതൽ രണ്ടാഴ്ചത്തേക്ക് രാജ്യത്തിന്റെ എല്ലാ ഗവർണറേറ്റുകളിലും ബീച്ചുകളും പൊതു പാർക്കുകളും അടച്ചിടും.റെസ്റ്റ് ഹൗസുകൾ,ഫാമുകൾ, വിന്റർ ക്യാമ്പുകൾ,തുടങ്ങിയ സ്ഥലങ്ങളിലെല്ലാം വിലക്ക് ബാധകമാണ്.വാണിജ്യ കേന്ദ്രങ്ങൾ,കടകൾ,മാർക്കറ്റുകൾ റസ്റ്റോറന്റുകൾ,കഫേകൾ,ജിമ്നേഷ്യം,എന്നിവയിൽ അമ്പത് ശതമാനം ആളുകളെയെ പ്രവേശിപ്പിക്കാൻ പാടുള്ളൂ.വെള്ളിയാഴ്ച മുതലായിരിക്കും ഇത് പ്രാബല്യത്തിൽ വരിക. കര അതിർത്തികൾ അടച്ചിടുന്നത് തുടരും.ട്രക്കുകൾക്ക് പ്രവേശനാനുമതി നൽകിയിട്ടുണ്ട്.

 

വടക്കൻ ഷർഖിയ ഗവർണറേറ്റിൽ എല്ലാ വാണിജ്യ പ്രവർത്തനങ്ങളും രാത്രി ഏഴ് മുതൽ പുലർച്ചെ ആറ് വരെ ഫെബ്രുവരി 12 വെള്ളിയാഴ്ച മുതൽ 14 ദിവസത്തേക്ക് അടച്ചിടാൻ സുപ്രീം കമ്മറ്റി തീരുമാനിച്ചു.ഇന്ധന സ്റ്റേഷനുകൾ, ആരോഗ്യ സ്ഥാപനങ്ങൾ, സ്വകാര്യ ഫാർമസികൾ എന്നിവക്ക് ഈ തീരുമാനം ബാധകമല്ല.പൗരന്മാരും വിദേശികളും രാജ്യത്തിന് പുറത്തോട്ടുള്ള യാത്ര ഒഴിവാക്കണമെന്ന് സുപ്രിം കമ്മിറ്റി നിർദ്ദേശിച്ചു.