HOME
DETAILS

കുട്ടികളെ ഉപയോഗിച്ച് ലഹരി വില്‍പ്പന: കേസെടുക്കാന്‍ ഇനി എക്‌സൈസിനും അധികാരം

  
backup
February 22 2021 | 17:02 PM

child-issue-drugs-news-order

 

തിരുവനന്തപുരം: കുട്ടികളെ ഉപയോഗിച്ച് ലഹരിപദാര്‍ഥങ്ങള്‍ വില്‍ക്കുന്നതും കൈവശം വയ്ക്കുന്നതും സംബന്ധിച്ച കുറ്റകൃത്യങ്ങള്‍ ചുമത്തി കേസെടുക്കാനുള്ള അധികാരം ഇനി എക്‌സൈസ് വകുപ്പിനും. ഇതു സംബന്ധിച്ച് സംസ്ഥാന ബാലാവകാശ സംരക്ഷണ കമ്മിഷനാണ് ഉത്തരവു പുറപ്പെടുവിച്ചത്. കമ്മിഷന്‍ ചെയര്‍മാന്‍ കെ. വി മനോജ്കുമാര്‍, കെ. നസീര്‍, റെനി ആന്റണി, സി. വിജയകുമാര്‍ എന്നിവര്‍ ഉള്‍പ്പെട്ട ഫുള്‍ ബഞ്ചിന്റേതാണ് ഉത്തരവ്.

വൈദ്യപരിശീലനം ലഭിച്ച വ്യക്തിയുടെ ഉത്തരവില്ലാതെ ലഹരി പദാര്‍ഥങ്ങളോ മയക്കുമരുന്നോ കൈവശം വയ്ക്കുകയോ വില്‍ക്കുകയോ എത്തിക്കുകയോ ഇതിനായി കുട്ടികളെ ഉപയോഗിക്കുകയോ ചെയ്താല്‍ ഏഴു വര്‍ഷം വരെ കഠിനതടവും ഒരു ലക്ഷം രൂപ പിഴയുമാണ് ശിക്ഷ.ബാലനീതി നിയമം 77, 78 വകുപ്പുകള്‍ പ്രകാരം ഇത്തരം കുറ്റകൃത്യങ്ങള്‍ക്ക് നിലവില്‍ കേസെടുക്കാന്‍ പൊലിസിന് മാത്രമാണ് അധികാരമുള്ളത്. എക്‌സൈസ് വിഭാഗത്തിനുകൂടി അധികാരം നല്‍കിയാല്‍ നിയമത്തിന്റെ നടത്തിപ്പ് കൂടുതല്‍ സുഗമമാകുമെന്ന് നിരവധി കൂടിയാലോചനായോഗങ്ങളിലും മറ്റും അഭിപ്രായം ഉയര്‍ന്നിരുന്നു. സ്‌കൂള്‍, കോളജ് പരിസരങ്ങളില്‍നിന്ന് ഉണ്ടാകുന്ന കേസുകള്‍ രജിസ്റ്റര്‍ ചെയ്യാന്‍ എക്‌സൈസ് വകുപ്പിനുകൂടി അധികാരം ലഭിക്കുന്ന പക്ഷം പ്രായപൂര്‍ത്തിയാകാത്തവര്‍ക്കിടയിലെ മദ്യം, മയക്കുമരുന്ന്, പുകയില ഉപയോഗത്തിന്റെ വ്യാപനവും വിതരണവും കാര്യക്ഷമമായി നിയന്ത്രിക്കാന്‍ കഴിയുമെന്ന് എക്‌സൈസ് വകുപ്പ് ചൂണ്ടിക്കാട്ടിയിരുന്നു.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."