ഹരിപ്പാട്: സ്‌കൂളിന് സമീപം ചത്ത പോത്തുകളെ തള്ളി. ചേപ്പാട് ഗ്രാമപഞ്ചായത്ത് ഗവ .എല്‍.പി.ബി.എസ് സ്‌കൂളിന് സമീപം ദേശീയ പാതയില്‍ രണ്ട് പോത്തുകളുടെ ജഡമാണ് തള്ളിയത്. ജഡങ്ങള്‍ കച്ചി ഇട്ട് മറച്ച നിലയിലായിരുന്നു. ഇന്നലെ രാവിലെ ഏഴ് മണിയോടെ പ്രദേശവാസികളാണ് റോഡരികില്‍ ചത്ത പോത്തുകളെ കണ്ടത്. രാത്രിയില്‍ വാഹനങ്ങളില്‍ എത്തി ചത്ത പോത്തകളെ റോഡില്‍ തള്ളിയിട്ട് പോയതാകാമെന്നാണ് കരുതുന്നത്. ഈ പ്രദേശത്ത് രാത്രി കാലങ്ങളില്‍ കക്കൂസ് മാലിന്യങ്ങള്‍ തള്ളുന്നതും പതിവായിരുന്നു. സ്‌കൂളിലെ കുട്ടികളുടെ ആരോഗ്യ പ്രശ്‌നങ്ങള്‍ കാണിച്ചും പ്രദേശവാസികളുടെ ബുദ്ധിമുട്ടുകള്‍ കാണിച്ചും നിരവധി പരാതികള്‍ നല്‍കിയതിന്റെ ആസ്ഥാനത്തില്‍ റോഡിന്റെ വശത്തെ കാടുകള്‍ വെട്ടിതെളിച്ചിരുന്നു. കക്കൂസ് മാലിന്യം തള്ളുന്നതിന് കുറവ് വന്നപ്പോള്‍ റോഡില്‍ ചത്ത പോത്തുകളെ കണ്ടെത്തിയത് പ്രതിഷേധത്തിന് ഇടയാക്കിയിട്ടുണ്ട്. പഞ്ചായത്ത് പ്രതിനിധികള്‍ സ്ഥലത്തെത്തി വൈകിട്ടോടെ പോത്തുകളെ മറവ് ചെയ്തു.