ദുബൈ: ദുബൈയിലെ പ്രവാസികള്‍ ഉള്‍പ്പെടെയുള്ളവര്‍ക്ക് ആശ്വാസം നല്‍കുന്ന റിപ്പോര്‍ട്ടുമായി അന്താരാഷ്ട്ര റേറ്റിങ് ഏജന്‍സിയായ എസ് ആന്റ് പി ഗ്ലോബല്‍. ദുബൈയിലെ റിയല്‍ എസ്‌റ്റേറ്റ് മേഖലയിലെ വാടകയില്‍ ഈയിടെയുണ്ടായ വലിയ വര്‍ധനവ് തുടരില്ലെന്നും കുറച്ചുകാലത്തേക്ക് അത് മാറ്റമില്ലാതെ തുടരുമെന്നും, ഒന്നര വര്‍ഷത്തിനു ശേഷം ദുബൈയിലെ കെട്ടിട വാടക നിരക്കില്‍ കുറവുണ്ടാകുമെന്നും ഏജന്‍സിയുടെ റിപ്പോര്‍ട്ടില്‍ പറയുന്നു.

ദുബൈയില്‍ പുതിയ കെട്ടിട നിര്‍മാണ പദ്ധതികള്‍ വലിയ തോതില്‍ പുരോഗമിക്കുന്നതാണ് വാടക നിരക്ക് കുറയുമെന്ന വിലയിരുത്തലിന് കാരണം. കോവിഡിന് ശേഷം റിയല്‍ എസ്‌റ്റേറ്റ് മേഖലയിലുണ്ടായ അഭൂതപൂര്‍വമായ ഡിമാന്‍ഡ് കാരണം ദുബൈയിലെ ഭൂരിഭാഗം പ്രദേശങ്ങളിലും വാടകയും വസ്തുവിലയും സ്ഥിരമായി വര്‍ദ്ധിച്ചുകൊണ്ടിരിക്കുന്ന സന്ദര്‍ഭത്തിലാണ് ഈ ആശ്വാസകരമായ റിപ്പോര്‍ട്ട്.

അടുത്ത 18 മാസക്കാലത്തേക്ക് ദുബൈയിലെ പ്രോപ്പര്‍ട്ടി വിലകളും വാടകയും നിലവിലെ നിരക്കില്‍ തുടരും. കോവിഡ് സൃഷ്ടിച്ച മാന്ദ്യത്തിനു ശേഷം നിരവധി പുതിയ റിയല്‍ എസ്‌റ്റേറ്റ് പദ്ധതികള്‍ പൂര്‍ത്തീകരണത്തിന്റെ അവസാന ഘട്ടത്തിലാണ്. ഇവ ഉപഭോക്താക്കള്‍ക്ക് ലഭ്യമാകുന്നതോടെ വാടക വിലയില്‍ വലിയ കുറവുണ്ടാവുമെന്നും എസ് ആന്റ് പി ഗ്ലോബല്‍ വിശകലന വിദഗ്ധര്‍ അഭിപ്രായപ്പെടുന്നു.

ലഭ്യമായ യൂണിറ്റുകളുടെ സ്റ്റോക്ക് 2025ല്‍ ആദ്യം നോണ്‍പ്രൈം ഏരിയകളിലും പിന്നീട് വിശാലമായ വിപണിയിലും വര്‍ദ്ധിക്കും ഇതനുസരിച്ച്, വാടക വളര്‍ച്ച സ്ഥിരത കൈവരിക്കുമെന്നും റിപ്പോര്‍ട്ട് പറയുന്നു. അടുത്ത 18 മാസങ്ങള്‍ക്കുള്ളില്‍ മാര്‍ക്കറ്റിലെ ഡിമാന്റിനേക്കാള്‍ കൂടുതല്‍ കെട്ടിടങ്ങളുടെ ലഭ്യത ഉണ്ടാകുമെന്നും ഇത് പ്രോപ്പര്‍ട്ടി വില കുറയാന്‍ സഹായിക്കുമന്നും ഏജന്‍സി വ്യക്തമാക്കുന്നു. റെസിഡന്‍ഷ്യല്‍ സപ്ലൈ സ്റ്റോക്ക് 2025-2026 കാലയളവില്‍ ഏകദേശം 182,000 യൂണിറ്റുകള്‍ വര്‍ദ്ധിക്കുമെന്നാണ് വിലയിരുത്തപ്പെടുന്നത്. 2019-2023ല്‍ പ്രതിവര്‍ഷം വിതരണം ചെയ്ത ശരാശരി 40,000 യൂണിറ്റുകളേക്കാള്‍ വളരെ കൂടുതലാണിതെന്ന് എസ് ആന്റ് പി ഗ്ലോബലിലെ പ്രൈമറി ക്രെഡിറ്റ് അനലിസ്റ്റ് സപ്ന ജഗ്തിയാനി അഭിപ്രായപ്പെട്ടു.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

According to a recent report, Dubai's rising rental prices are expected to stabilize and eventually decrease within the next 18 months, bringing relief to expats and tenants facing increasing housing costs.