കൊച്ചി
ദിലീപിനുവേണ്ടി അഭിഭാഷകർ നടത്തിക്കൊണ്ടിരിക്കുന്നത് തികച്ചും നിയമവിരുദ്ധമായ പ്രവൃത്തികളാണെന്ന് ആക്രമിക്കപ്പെട്ട നടി ബാർ കൗൺസിലിൽ പരാതി നൽകി. ദിലീപിന്റെ അഭിഭാഷകരായ ബി. രാമൻപിള്ള, ഫിലിപ്പ് ടി. വർഗീസ്, സുജേഷ് മേനോൻ എന്നിവർക്കെതിരേയാണ് മാതൃകാപരമായ നടപടികൾ സ്വീകരിക്കണമെന്ന് ആവശ്യപ്പെട്ട് പരാതി നൽകിയത്.കേസിന്റെ വിചാരണ ആരംഭിച്ചതുമുതൽ തങ്ങളുടെ പ്രവൃത്തിക്ക് നിരക്കാത്ത രീതിയിലാണ് അഭിഭാഷകർ ഇടപെട്ടുകൊണ്ടിരിക്കുന്നത്. കേസിലെ പ്രോസിക്യൂഷൻ സാക്ഷിയായ ജിൻസൺ എന്നയാളെ സ്വാധീനിക്കുന്നതിനായി ഇയാളുമായി ബന്ധമുള്ള നാസർ എന്നയാളെ അഡ്വ. രാമൻപിള്ള നേരിട്ടും ഫോൺ മുഖേനയും ബന്ധപ്പെട്ടിരുന്നു. കൂടാതെ ജിൻസണ് 25 ലക്ഷം രൂപയും 5 സെന്റ് വസ്തുവും വാഗ്ദാനം നൽകി. ഇതുമായി ബന്ധപ്പെട്ട് രജിസ്റ്റർ ചെയ്ത കേസിൽ ഇദ്ദേഹത്തെ ചോദ്യം ചെയ്യുന്നതിന് രാമൻപിള്ളക്ക് പൊലിസ് നോട്ടിസ് നൽകിയെങ്കിലും അദ്ദേഹം അഭിഭാഷക സംഘടനകളെ മുന്നിൽ നിർത്തി ശ്രമം നടത്തിയെന്നും നടി പരാതിയിൽ പറയുന്നു.