തിരുവനന്തപുരം: ഇടതു സര്‍ക്കാര്‍ നല്‍കിയ ഉറപ്പ് പാലിക്കാത്തതില്‍ പ്രതിഷേധിച്ച് മലപ്പുറത്തു നടത്തിയിരുന്ന എല്‍.പി സ്‌കൂള്‍ ടീച്ചേഴ്‌സ് ഉദ്യോഗാര്‍ഥികളുടെ പ്രതിഷേധം സെക്രട്ടേറിയറ്റിനു മുന്നിലേക്കുമാറ്റി. കഴിഞ്ഞ ദിവസം കെ.ടി ജലീല്‍ എംഎല്‍എയെ ഇവര്‍ സന്ദര്‍ശിച്ച് സമരത്തെക്കുറിച്ച് സംസാരിച്ചപ്പോള്‍ കെ.ടി ജലീല്‍ എം.എല്‍.എ അപമാനിച്ചുവെന്നാണ് ഇവരുടെ പരാതി. തല മുണ്ഡനം ചെയ്തുള്ള പ്രതിഷേധ പരിപാടികളെപ്പറ്റി അറിയിച്ചപ്പോള്‍ 'തല മുണ്ഡനം ചെയ്താല്‍ പളനിക്ക് പോകാമല്ലോ' എന്ന് പറഞ്ഞ് ജലീല്‍ അധിക്ഷേപിച്ചു എന്നും ഇവര്‍ ആരോപിക്കുന്നു.

നാല് ദിവസമായി ഉദ്യോഗാര്‍ഥികള്‍ സെക്രട്ടേറിയറ്റിനു മുന്നില്‍ നിരാഹാര സമരത്തിലാണ്. മലപ്പുറം സിവില്‍ സ്റ്റേഷനു മുന്നില്‍ 90 ദിവസമായി നടത്തിവന്ന സമരമാണ് സെക്രട്ടേറിയറ്റ് പടിക്കലേക്കുമാറ്റിയത്. ആദ്യ ദിവസം മുട്ടിലിഴഞ്ഞായിരുന്നു പ്രതിഷേധം.
ഞങ്ങള്‍ തിരഞ്ഞെടുത്ത ജനാധിപത്യ സര്‍ക്കാരിനെ ഞങ്ങള്‍ വിശ്വസിച്ചു. എത്ര വനിതാ മന്ത്രിമാരുണ്ട് നിയമസഭയില്‍. ഒരു മന്ത്രി തിരിഞ്ഞുനോക്കിയോ?'- ഉദ്യോഗാര്‍ഥികള്‍ ചോദിക്കുന്നു.

എല്ലാവരെപ്പോലെ ഞങ്ങളും ഒരു സര്‍ക്കാര്‍ ജോലി ആഗ്രഹിച്ചു. യാതൊരു മാനദണ്ഡവും പാലിക്കാതെയാണ് മലപ്പുറത്തെ ലിസ്റ്റ് ചുരുക്കിയ്തത്. ചെയ്തത് ശരിയെന്നോ തെറ്റെന്നോ സര്‍ക്കാര്‍ പറയണം. ഇനി ഞങ്ങളെന്താ ചെയ്യേണ്ടത്.