പട്‌ന: ഡല്‍ഹിയില്‍ നിന്ന് പട്‌നയിലേക്കുള്ള ഇന്‍ഡിഗോ വിമാനത്തില്‍ മദ്യപിച്ച് ബഹളമുണ്ടാക്കിയതിന് രണ്ട് യാത്രക്കാരെ പട്‌ന എയര്‍പോര്‍ട്ട് പൊലിസ് അറസ്റ്റ് ചെയ്തു. ഇന്‍ഡിഗോ 6ഇ 6383 വിമാനത്തില്‍ ഞായറാഴ്ച്ച രാത്രിയായിരുന്നു സംഭവം.

ഡല്‍ഹിയില്‍ നിന്ന് മദ്യപിച്ച ശേഷം വിമാനത്തില്‍ കയറിയ യാത്രക്കാര്‍ വിമാനത്തിലിരുന്ന് വീണ്ടും മദ്യപിക്കുകയായിരുന്നു. പിന്നീടിവര്‍ വിമാനജീവനക്കാരുമായി വാക്കുതര്‍ക്കമുണ്ടായി. പിന്നാലെ വിമാനജീവനക്കാര്‍ വിവരം എയര്‍ ട്രാഫിക് കണ്‍ട്രോളില്‍ അറിയിക്കുകയായിരുന്നു. തുടര്‍ന്ന് വിമാനം പട്‌ന വിമാനത്താവളത്തില്‍ ഇറങ്ങിയപ്പോള്‍, സി.ഐ.എസ്.എഫ് രണ്ടുപേരെ കസ്റ്റഡിയിലെടുത്ത് പൊലിസിന് കൈമാറി.

നേരത്തെ, എയര്‍ ഇന്ത്യ വിമാനത്തില്‍ മദ്യലഹരിയില്‍ യാത്രക്കാരന്‍ സഹയാത്രികയുടെ ശരീരത്തില്‍ മൂത്രമൊഴിച്ച സംഭവം വന്‍വിവാദമായിരുന്നു.