സീതാംഗോളി: സ്വകാര്യ ബസ് കാറിലും ബൈക്കിലും ഇടിച്ച് ബൈക്ക് യാത്രക്കാരായ പിതാവിനും മക്കള്‍ക്കും ഗുരുതര പരുക്ക്. പരുക്കേറ്റ അംഗഡിമുഗര്‍ സ്വദേശിയും കുമ്പളയിലെ വ്യാപാരിയുമായ മുഹമ്മദ് ഷെരീഫ് (46), മക്കള്‍ സൂരംബയല്‍ സി.എച്ച് മുഹമ്മദ് കോയ മെമ്മോറിയല്‍ ഇംഗ്‌ളീഷ് മീഡിയം സ്‌കൂള്‍ വിദ്യാര്‍ഥികളായ ആയിഷത്ത് തന്‍സീഹ (10), അഹമ്മദ് ഫിറോസ് (ഏഴ്) എന്നിവരെ മംഗളൂരുവിലെ ആശുപത്രിയില്‍ പ്രവേശിപ്പിച്ചു.
ഇന്നലെ രാവിലെ 10 മണിയോടെ സൂരംബയലിലാണ് അപകടം. അംഗഡി മുഗറിലെ വീട്ടില്‍ നിന്നു കുട്ടികളുമായി ബൈക്കില്‍ സൂരംബയലിലെ സ്‌കൂളിലേക്കു പോവുകായിരുന്നു മുഹമ്മദ് ഷെരീഫ്. കുമ്പളയില്‍ നിന്നു സീതാംഗോളിയിലേക്കു പോവുകയായിരുന്ന സ്വകാര്യ ബസാണ് അപകടം വരുത്തിയത്. സൂരംബയല്‍ വളവില്‍ മറ്റൊരു വാഹനത്തെ മറികടക്കുന്നതിനിടെ നിയന്ത്രണം വിട്ട ബസ് കാറിലും ബൈക്കിലും ഇടിക്കുകയായിരുന്നു.