ന്യൂഡല്‍ഹി: തുടര്‍ച്ചയായി അഞ്ചാം ദിവസവും ഇന്ധന വിലയില്‍ വര്‍ധനവ്. പെട്രോളിന് 83 പൈസയും ഡീസലിന് 77 പൈസയുമാണ് കഴിഞ്ഞ ദിവസം കൂട്ടിയത്. ഇതോടെ കൊച്ചിയില്‍ പെട്രോള്‍ ലിറ്ററിന് 107 രൂപ 65 പൈസയും ഡീസലിന് 94 രൂപ 72 പൈസയുമായി വില ഉയര്‍ന്നു.

ഇക്കഴിഞ്ഞ ചൊവ്വാഴ്ച മുതലാണ് ഇന്ധന വില ഒരു ഇടവേളയ്ക്ക് ശേഷം വീണ്ടും വര്‍ധിക്കാന്‍ തുടങ്ങിയത്. ഇതോടെ അഞ്ച് ദിവസത്തിനിടെ പെട്രോളിന് കൂടിയത് 3.48 രൂപയാണ്. ഡീസലിന് 3.30 രൂപയും ഈ ദിവസങ്ങളില്‍ വര്‍ധിച്ചു.

അഞ്ചു മാസത്തെ ഇടവേളയ്ക്കുശേഷം ഗാര്‍ഹിക സിലിണ്ടര്‍ വിലയും കഴിഞ്ഞദിവസം വര്‍ധിച്ചു. എല്‍പിജി സിലിണ്ടറിന് ഒറ്റയടിക്ക് 50 രൂപയാണ് കൂടിയത്. ചുട്ടുപൊള്ളുന്ന ചൂടിനൊപ്പം തൊട്ടാല്‍ പൊള്ളുന്ന വിലക്കയറ്റം കൂടി വന്നതോടെ പ്രതിസന്ധിയിലായിരിക്കുകയാണു സാധാരണക്കാര്‍.