ന്യൂഡൽഹി
കൊവിഡ് ഭീതിയകന്ന സാഹചര്യത്തിൽ രണ്ടു വർഷത്തിനു ശേഷം രാജ്യത്ത് അന്താരാഷ്ട്ര വിമാന സർവിസുകൾ ഇന്ന് പുനരാരംഭിക്കും.
വിമാനങ്ങളിൽ സാമൂഹിക അകലം പാലിക്കുന്നത് അടക്കമുള്ള മാനദണ്ഡങ്ങൾ ഒഴിവാക്കി എയർപോർട്ട് അതോറിറ്റി ഓഫ് ഇന്ത്യ പുതിയ മാർഗനിർദേശങ്ങൾ പുറത്തിറക്കി. വിമാന ജീവനക്കാർ പി.പി.ഇ കിറ്റ് ധരിക്കണമെന്ന നിബന്ധനയും ഒഴിവാക്കിയിട്ടുണ്ട്.
അതേസമയം വിമാനത്താവളത്തിനകത്തും പുറത്തും മാസ്‌ക് ധരിക്കുന്നതു സംബന്ധിച്ച് നിലവിലുള്ള അവസ്ഥ തുടരേണ്ടിവരും. കൊവിഡ് പശ്ചാത്തലത്തിൽ യാത്രക്കാരെ പരിശോധിക്കുന്നത് നിർത്തലാക്കിയ നടപടി വിമാനത്താവളങ്ങളിൽ പുനരാരംഭിക്കണമെന്ന നിർദേശവും പുതിയ മാർഗനിർദേശത്തിലുണ്ട്.
ഇന്ത്യൻ വിമാനക്കമ്പനികൾ സാധാരണരീതിയിലുള്ള സർവിസിന് തയാറെടുത്തതോടെ എമിറേറ്റ്സ്, വിർജിൻ അറ്റ്ലാൻ്റിക് പോലുള്ള വിദേശ വിമാനക്കമ്പനികളും ഇന്ത്യയിലേക്കും തിരിച്ചും സർവിസ് നടത്തുന്നതിനുള്ള പദ്ധതികൾ പ്രഖ്യാപിച്ചിട്ടുണ്ട്.
കൊവിഡ് വ്യാപനം രൂക്ഷമായതോടെ 2020 മാർച്ച് 23നാണ് അന്താരാഷ്ട്ര വിമാന സർവിസുകൾ ഇന്ത്യ റദ്ദാക്കിയത്. എന്നാൽ ഉഭയകക്ഷി കരാർ പ്രകാരമുള്ള എയർ ബബിൾ പദ്ധതിക്കു കീഴിൽ വിവിധ വിദേശ രാജ്യങ്ങളിൽ നിന്ന് ഇന്ത്യയിലേക്ക് വിമാന സർവിസ് നടത്തിവരുന്നുണ്ട്. കൊവിഡ് വ്യാപനം കുറഞ്ഞതോടെ 27 മുതൽ വിമാന സർവിസുകൾ പഴയപടി പുനരാരംഭിക്കുമെന്ന് ഈമാസം എട്ടിനാണ് വ്യോമയാന മന്ത്രാലയം പ്രഖ്യാപിച്ചത്.