ചെന്നൈ: ഇന്ത്യന്‍ പ്രീമിയര്‍ ലീഗില്‍ നിലവിലെ ചാംപ്യന്‍മാരായ മുംബൈ ഇന്ത്യന്‍സും മൂന്നാം സ്ഥാനക്കാരായ സണ്‍റൈസേഴ്‌സും ഇന്ന് നേര്‍ക്കുനേര്‍. ചെന്നൈ എം.എ ചിദംബരം സ്‌റ്റേഡിയത്തില്‍ 7.30നാണ് മത്സരം. ആദ്യ മത്സരത്തില്‍ ആര്‍.സി.ബിയോട് തോറ്റെങ്കിലും രണ്ടാം മത്സരത്തില്‍ കൊല്‍കത്ത നൈറ്റ് റൈഡേഴ്‌സിനോട് പൊരുതി നേടിയ ജയത്തിന്റെ ആത്മവിശ്വാസത്തില്‍ മുംബൈ ഇറങ്ങുമ്പോള്‍ കെ.കെ.ആറിനോടും ആര്‍.സി.ബിയോടും തോറ്റതിന്റെ നിരാശതീര്‍ക്കാനെന്ന മോഹവുമായിട്ടാണ് ഹൈദരാബാദിന്റെ ഇറക്കം.

അഞ്ച് തലണ ചാംപ്യന്‍മാരായ കരുത്താണ് മുംബൈക്ക് പറയാനുള്ളത്. ബാറ്റിങ്ങിലും ബോളിങ്ങിലും ഒരുപോലെ കരുത്തുണ്ട് മുംബൈയ്ക്ക്. ക്യാപ്റ്റന്‍ രോഹിത് നയിക്കുന്ന ബാറ്റിങ് നിരയില്‍ തിളങ്ങാന്‍ ഇഷാന്‍ കിഷനും സൂര്യകുമാര്‍ യാദവും അടിച്ചു തകര്‍ക്കാന്‍ ഹാര്‍ദിക് പാണ്ഡ്യയും സഹോദരന്‍ ക്രുണാലും കയ്‌റാന്‍ പൊള്ളാര്‍ഡുമുണ്ട്.

ഡേവിഡ് വാര്‍ണര്‍, വൃദ്ധിമാന്‍ സാഹ, കെയ്ന്‍ വില്യംസന്‍, മനീഷ് പാണ്ഡെ, ജോണി ബെയര്‍‌സ്റ്റോ എന്നിവരുടെ ബാറ്റിങ് കരുത്തിലാണ് ഹൈദരാബാദിന്റെ പ്രതീക്ഷ. റാഷിദ് ഖാന്‍, ഭുവനേശ്വര്‍ കുമാര്‍, ടി.നടരാജന്‍, വിജയ് ശങ്കര്‍ എന്നിവരുടെ ബോളിങ് മികവില്‍ എതിരാളികളെ പിടിച്ചുകെട്ടാനാവും എന്ന വിശ്വാസം ഹൈദരാബാദിനു നല്‍കുന്നത് ചെറിയ ആത്മവിശ്വാസമൊന്നുമല്ല.