റിയാദ്: ഫിഫ ക്ലബ് ലോകകപ്പ് ഫുട്‌ബോള്‍ ഫൈനലിലേക്ക് യോഗ്യത നേടിയ സഊദി അറേബ്യയുടെ അല്‍ഹിലാല്‍ ടീമിലെ ഓരോ കളിക്കാരനും 15 ലക്ഷം റിയാല്‍ (ഏതാണ്ട് 3.30 കോടി രൂപ) പാരിതോഷികം. വിജയികള്‍ക്ക് ഫിഫയും ക്ലബ്ബും നല്‍കുന്ന സമ്മാനങ്ങള്‍ക്ക് പുറമേയാണിത്.

ഫൈനലിലെത്തിയ ടീമിലെ ഓരോ അംഗത്തിനും സഊദി കായിക മന്ത്രി അബ്ദുല്‍ അസീസ് ബിന്‍ തുര്‍ക്കി അല്‍ഫൈസല്‍ അഞ്ചു ലക്ഷം റിയാല്‍ പാരിതോഷികം പ്രഖ്യാപിച്ചു. സെമിഫൈനല്‍ മല്‍സരം കാണാന്‍ കായിക മന്ത്രി മൊറോക്കോയിലെത്തിയിരുന്നു. ഫൈനലിലെത്തിയാല്‍ ഓരോ താരത്തിനും 10 ലക്ഷം റിയാല്‍ നല്‍കുമെന്ന് അല്‍ഹിലാല്‍ ക്ലബ്ബിന്റെ ഓണററി അംഗമായ അല്‍വലീദ് ബിന്‍ തലാല്‍ രാജകുമാരന്‍ പ്രഖ്യാപിച്ചിരുന്നു. ലോകത്തെ എണ്ണപ്പെട്ട ശതകോടീശ്വരന്‍മാരില്‍ ഒരാളാണ് സഊദി രാജകുടുംബാഗം കൂടിയായ അല്‍വലീദ് ബിന്‍ തലാല്‍.