മുംബൈ: പന്തുകൊണ്ടു കുല്‍ദീപ് യാദവും ഖലീല്‍ അഹമ്മദും ബാറ്റുകൊണ്ടു ഡേവിഡ് വാര്‍ണറും (61), പൃഥ്വി ഷായും (51) നിറഞ്ഞാടിയ ഐ.പി.എല്‍ പോരില്‍ കൊല്‍ക്കത്തയെ വീഴ്ത്തി ക്യാപിറ്റല്‍സ്. കൊല്‍ക്കത്ത നൈറ്റ് റൈഡേഴ്‌സിനെതിരെ ഡല്‍ഹി ക്യാപിറ്റല്‍സ് 44 റണ്‍സിന്റെ ജയം നേടി.

ടോസ് നഷ്ടമായി ബാറ്റിങ്ങിന് ഇറങ്ങിയ ഡല്‍ഹി അഞ്ച് വിക്കറ്റ് നഷ്ടത്തില്‍ 215 റണ്‍സ് നേടി. 216 വിജയലക്ഷ്യത്തിലേക്ക് ബാറ്റുവീശിയ കൊല്‍ക്കത്ത 19.4 ഓവറില്‍ 171 ന് എല്ലാവരും പുറത്തായി. നാല് വിക്കറ്റ് നേടിയ കുല്‍ദീപ് യാദവും മൂന്നു വിക്കറ്റു വീഴ്ത്തി ഖലീല്‍ അഹമ്മദുമാണ് ഡല്‍ഹിയെ തകര്‍ത്തത്. 54 റണ്‍സ് നേടിയ ക്യാപ്ടന്‍ ശ്രേയസ് അയ്യരാണ് കൊല്‍ക്കത്തയുടെ ടോപ് സ്‌കോറര്‍. ശ്രേയസിന് പുറമേ നിതീഷ് റാണ (30) മാത്രമാണ് കൊല്‍ക്കയ്ക്കായി ഭേദപ്പെട്ട പ്രകടനം കാഴ്ചവെച്ചത്. അജിന്‍ക്യ രാഹനെ (8), വെങ്കടേഷ് അയ്യര്‍ (18), സാം ബില്ലിങ്‌സ് (15), പാറ്റ് കമ്മിന്‍സ് (4), സുനില്‍ നരേയ്ന്‍ (4), ഉമേഷ് യാദവ് (0), ആന്ദ്രേ റസല്‍ (24), റാസിഖ് സലാം (7) എന്നിവരാണ് പുറത്തായ മറ്റു താരങ്ങള്‍. വരുണ്‍ ചക്രവര്‍ത്തി (1) പുറത്താവാതെ നിന്നു. പവര്‍ പ്ലേയില്‍ തന്നെ കൊല്‍ക്കത്തയ്ക്ക് വെങ്കടേഷ് - രഹാനെ സഖ്യത്തെ നഷ്ടമായിരുന്നു. റാണ - ശ്രേയസ് സഖ്യമാണ് നൈറ്റ് റൈഡേഴ്‌സിനെ തകര്‍ച്ചയില്‍ നിന്നും രക്ഷിച്ചത്. ഈ സഖ്യം 69 റണ്‍സ് കൂട്ടിചേര്‍ത്തു.

പിന്നീട് കൂട്ടത്തകര്‍ച്ച ഒഴിവാക്കാന്‍ കൊല്‍ക്കത്തയ്ക്കായില്ല. മികച്ച തുടക്കമാണ് വാര്‍ണര്‍ - പൃഥ്വി കൂട്ടുക്കെട്ട് ഡല്‍ഹിക്ക് സമ്മാനിച്ചത്. ആദ്യ വിക്കറ്റ് കൂട്ടുക്കെട്ടില്‍ പിറന്നത് 84 റണ്‍സ്. രണ്ട് സിക്‌സും ഏഴ് ഫോറും അടങ്ങുന്ന ഇന്നിങ്ങ്‌സില്‍ 29 പന്തില്‍ 51 റണ്‍സ് നേടിയ പൃഥ്വിയെ വരുണ്‍ ചക്രവര്‍ത്തി പുറത്താക്കി. മൂന്നാമനായി ക്രീസിലെത്തിയ നായകന്‍ റിഷഭ് പന്ത് 14 പന്തില്‍ 27 റണ്‍സ് നേടി. പിന്നാലെ വന്ന ലളിത് യാദവ് (1), റോവ്മാന്‍ പവല്‍ (8) എന്നിവര്‍ വേഗം കീഴടങ്ങി. പിന്നാലെ അര്‍ധസെഞ്ചുറി പിന്നിട്ട വാര്‍ണറും മടങ്ങി. അക്‌സര്‍ പട്ടേലും (22), ഷാര്‍ദുല്‍ ഠാക്കൂറും (29) ചേര്‍ന്നു ഡല്‍ഹിയെ മികച്ച സ്‌കോറിലേക്ക് നയിച്ചു.