ഇടുക്കി: കുമളിയില്‍ മൊബൈല്‍ ഷോപ്പില്‍ നിന്ന് രണ്ട് ആഡംബര ഫോണുകള്‍ മോഷ്ടിച്ച കേസില്‍ സ്വകാര്യ ബാങ്ക് മാനേജര്‍ പൊലിസ് പിടിയില്‍. തമിഴ് നാട് തിരിച്ചിറപ്പള്ളി സ്വദേശി ദീപക് മനോഹറിനെയാണ് പൊലീസ് പിടിച്ചത്.  കേരള പൊലീസ് തമിഴ്‌നാട്ടില്‍ എത്തിയാണ് ദീപകിനെ അറസ്റ്റ് ചെയ്തത്. സുഹൃത്തുമായി തേക്കടിയിലെ കടയിലെത്തിയാണ് ദീപക് ഫോണ്‍ മോഷ്ടിച്ചത്.

ഫോണ്‍ വാങ്ങാനെന്ന വ്യാജേന സംഘം കുമളിയിലെ കടയില്‍ എത്തിയതായിരുന്നു. പിന്നാലെ ആഡംബര ഫോണ്‍ മോഷ്ടിച്ച് തമിഴ്‌നാട്ടിലേക്ക് കടന്ന് കളഞ്ഞു. സിസിടിവി ദൃശ്യങ്ങള്‍ പരിശോധിച്ച പൊലീസ് തിരുച്ചിറപ്പള്ളിയിലെ വീട്ടില്‍ എത്തിയാണ് ദീപകിനെ അറസ്റ്റ് ചെയ്തത്.